30 এপ্ৰিললৈ বৃদ্ধি হ'ব লকডাউন : বিশেষ সূত্ৰ

30 এপ্ৰিললৈ বৃদ্ধি হোৱাৰ সম্ভাৱনা আছে লকডাউন ৷ এই কথা টুইটাৰৰ জৰিয়তে প্ৰকাশ কৰে অৰবিন্দ কেজৰিৱালে ৷

নেশ্যনেল ডেস্ক, 11 এপ্ৰিল : দিল্লীৰ মুখ্যমন্ত্ৰী অৰবিন্দ কেজৰিৱালে শনিবাৰে টুইটাৰৰ জৰিয়তে জনাই যে, প্ৰধানমন্ত্ৰী নৰেন্দ্ৰ মোডীয়ে লকডাউন বৃদ্ধি কৰিবলৈ সন্মতি প্ৰকাশ কৰিছে ৷ সকলোবোৰ ৰাজ্যৰে মুখ্যমন্ত্ৰী সকলৰ সৈতে অনুষ্ঠিত হোৱা ভিডিঅ' কনফাৰেন্সিং বৈঠকত কাপোৰেৰে তৈয়াৰী মাস্ক পৰিধান কৰা পৰিলক্ষিত হয় প্ৰধানমন্ত্ৰী মোডীক ৷ প্ৰধানমন্ত্ৰী মোডীয়ে সকলো মুখ্যমন্ত্ৰীকে জানিবলৈ দিয়ে যে, তেওঁ 24 ঘন্টাই সকলোৰে সেৱাত উপলব্ধ থাকিব ৷

দেশত ক্ষিপ্ৰতাৰে বৃদ্ধি পোৱা COVID-19 সংক্ৰমণ প্ৰতিৰোধৰ বাবে এয়া প্ৰধানমন্ত্ৰী মোডীৰ ৰাজ্যৰ মুখ্যমন্ত্ৰীসকলৰ সৈতে তৃতীয়খন ভিডিঅ' কনফাৰেন্সিং বৈঠক ৷

এই বৈঠকত মোডীয়ে কয়, "মই 24x7 উপলব্ধ থাকিম ৷ যিকোনো ৰাজ্যৰে মুখ্যমন্ত্ৰীয়ে মোৰ সৈতে কথা পাতিব পাৰিব আৰু তেওঁলোকৰ পৰামৰ্শ প্ৰদান কৰিব পাৰিব ৷"

তেওঁ কয় যে, এই ৰোগৰ বিৰুদ্ধে যুঁজিবৰ বাবে সকলোৱে হাতে হাত ধৰি আগবাঢ়ি যাব লাগিব ৷ উল্লেখ্য যে, প্ৰধানমন্ত্ৰী মোডীয়ে বৈঠকত কাপোৰেৰে তৈয়াৰী মাস্ক পৰিধান কৰি সকলোকে ঘৰতে প্ৰস্তুত কৰা মাস্ক পিন্ধিবলৈ উৎসাহ যোগায় ৷

উল্লেখ্য় যে, শনিবাৰ পৰ্যন্ত ভাৰতত COVID-19 ত আক্ৰান্ত লোকৰ সংখ্যা 7,447 জনলৈ বৃদ্ধি পোৱাৰ লগতে মৃত্যু হৈছে 239 জনৰ ৷