নিউজ ডেস্ক, ৬ মে' : বুধবাৰৰ পৰা তেলেংগানাত খোলা হ'ব সুৰাৰ বিপনী । মঙলবাৰে এক সংবাদমাধ্যমযোগে এই কথা প্ৰকাশ কৰিছে ৰাজ্যখনৰ মুখ্যমন্ত্ৰী কে. চন্দ্ৰশেখৰ ৰাওৱে । ১৬ শতাংশ অতিৰিক্ত আৱকাৰী কৰ বৃদ্ধিৰে এইসমূহ সুৰাৰ বিপনী খোলাৰ অনুমতি প্ৰদান কৰিছে তেলেংগানা ৰাজ্য চৰকাৰে ।
মুখ্যমন্ত্ৰীগৰাকীয়ে প্ৰকাশ কৰা অনুসৰি, ৰাজ্যখনৰ ১৫ খনক বাদ দি ২,২০০ খন সুৰাৰ বিপনী খোলাৰ অনুমতি প্ৰদান কৰা হৈছে । ৰেড জ'নত থকা সুৰাৰ বিপনীয়ো খোলাত অনুমতি দিয়া হৈছে যদিও কন্টেইনমেন্ট এলেকাত থকা বিপনীসমূহ বন্ধ থাকিব বুলি জনাইছে মুখ্যমন্ত্ৰীগৰাকীয়ে ।
প্ৰত্যেকখন সুৰাৰ বিপনীতে সামাজিক দুৰত্ব পালন কৰিবলৈ কোৱা হৈছে । মুখা (মাস্ক) অবিহনে সুৰা ক্ৰয় তথা বিক্ৰী দুয়োটাতে নিষেধাজ্ঞা আৰোপ কৰা হৈছে । দিনৰ ১০ বজাৰ পৰা আবেলি ৬ বজালৈ সুৰাৰ বিপনীসমূহ খোলা থাকিব আৰু এইখিনি সময়ত নিৰ্ধাৰিত নিয়ম পালন নকৰিলে গ্ৰাহক তথা সুৰাৰ বিপনীৰ বিৰুদ্ধে কঠোৰ ব্যৱস্থা গ্ৰহণ কৰা হ'ব বুলি সংবাদমাধ্যমৰ আগত প্ৰকাশ কৰে মুখ্যমন্ত্ৰী কে. চন্দ্ৰশেখৰ ৰাওৱে ।