নিউজ ডেস্ক, ৩ জুলাই : আন্তঃৰাষ্ট্ৰীয় প্লাষ্টিক বেগ মুক্ত দিৱসৰ দিনটোতে বন,পৰিবেশ আৰু জলবায়ু পৰিবৰ্তন মন্ত্ৰণালয়ে (MoEF&CC) আমি সকলোৱে প্লাষ্টিকৰ বেগ ব্যৱহাৰ নকৰাৰ সংকল্প গ্ৰহণ কৰা উচিত বুলি মন্তব্য কৰে। সকলো ক্ষেত্ৰতে আমি প্লাষ্টিকৰ বেগ ব্যৱহাৰ কৰো যদিও এই বেগসমূহে খাদ্য, পানী, ভূমি আদি সকলোতে প্ৰদূষণৰ মাত্ৰা বৃদ্ধি কৰে। প্লাষ্টিকৰ বেগ ব্যৱহাৰ কৰাটো স্বাস্থ্যৰ পক্ষে হানিকাৰক । সেয়ে আমি সকলোৱে একত্ৰিত হৈ অধিক উন্নত পৰিৱেশ গঢ়ি তোলাৰ বাবে কাম কৰিব লাগে বুলি বন, পৰিবেশ আৰু জলবায়ু পৰিবৰ্তন মন্ত্ৰণালয়ে টুইটাৰযোগে উল্লেখ কৰে।
আমাৰ চৌপাশে প্লাষ্টিক মুক্ত কৰাৰ উদ্দেশ্যে ২০১৭ চনৰ ৩ জুলাইত প্লাষ্টিক বেগ বৰ্জনৰ এক গুৰুত্বপূৰ্ণ সিদ্ধান্ত হাতত লোৱা হৈছিল ৷ এই দিনটোৰ জৰিয়তে সমগ্ৰ বিশ্বতেই "প্লাষ্টিক বিহীন এখন পৃথিৱীও সম্ভৱ আৰু প্লাষ্টিক বেগৰ বিকল্প আন বেগৰ জৰিয়তেও পূৰণ কৰিব পাৰি" এই বাৰ্তা প্ৰচাৰৰ চেষ্টা কৰা হয় ৷ তদুপৰি আন্তঃৰাষ্ট্ৰীয় প্লাষ্টিক বেগ মুক্ত দিৱসৰ জৰিয়তে সমগ্ৰ বিশ্বত প্লাষ্টিক ব্যৱহাৰৰ ফলত হ'বলগীয়া ক্ষতি সন্দৰ্ভত ৰাইজৰ মাজত সজাগতা সৃষ্টি কৰা হয়।