CAA বিৰোধী প্ৰতিবাদত বন্ধুকধাৰীৰ আক্ৰমণত আহত জামিয়াৰ ছাত্ৰ

জামিয়া মিলিয়াত বন্ধুকধাৰীৰ গুলীচালনা ৷ আহত এজন ছাত্ৰ ৷

নেশ্যনেল ডেস্ক, 30 জানুৱাৰী : বৃহস্পতিবাৰে জামিয়া মিলিয়া ইছলামিয়া বিশ্ববিদ্যালয়ত নাগৰিকত্ব সংশোধনী আইন বিৰোধী প্ৰতিবাদৰ মাজতে এজন বন্ধুকধাৰীয়ে গুলীচালনা কৰাত এজন ছাত্ৰ আহত হয় ৷ প্ৰত্যক্ষদৰ্শীয়ে জানিবলৈ দিয়া অনুসৰি, ঘটনা সংঘটিত কৰিয়ে বন্ধুকধাৰীজনে 'এইয়া ল' স্বাধীনতা' বুলি চিঞৰে ৷ ঘটনা সংঘটিত কৰাৰ পাচতে বন্ধুকধাৰী জনক আৰক্ষীয়ে আটক কৰিবলৈ সক্ষম হয় ৷ সমগ্ৰ ঘটনাই অঞ্চলটোত ব্যাপক উত্তেজনাপূৰ্ণ পৰিস্থিতিৰ সৃষ্টি কৰিছে ৷ জেকেট আৰু পেন্ট পৰিহিত লোকজনে আৰক্ষী বেৰিকেডৰ মাজেৰে হিন্দী ভাষাত প্ৰতিবাদকাৰীক হুংকাৰ দিয়া পৰিলক্ষিত হয় আৰু সমগ্ৰ ঘটনা টেলিভিছনৰ কেমেৰাত বন্দী হৈ ৰয় ৷

কিছু টেলিভিছনে চেনেলে বন্ধুকধাৰীজন গোপাল বুলি দাবী কৰিছে যদিও বৰ্তমানলৈকে এই ক্ষেত্ৰত আৰক্ষীয়ে নিশ্চিতি প্ৰদান কৰা নাই ৷

বিশ্ববিদ্যালয়খনৰ আমনা আছিফ নামৰ এগৰাকী ছাত্ৰীয়ে কয়, "আমি হলী ফেমিলী হাস্পতাললৈ আগবাঢ়ি যোৱা এলেকাত আৰক্ষীয়ে বেৰিকেড লগাই ৰাখিছিল ৷ হঠাৎ বন্ধুকধাৰী লোকজন ক'ৰবাৰ পৰা আহি মুকলিকৈ গুলীচালনা আৰম্ভ কৰে ৷ এটা গুলীয়ে মোৰ বন্ধুৰ হাতত আঘাত কৰে ৷" সাংবাদিকতা বিভাগৰ ছাত্ৰ ছাদাব ফাৰুক এই আক্ৰমণৰ ফলত আহত হোৱাৰ পাচতে চিকিৎসাৰ বাবে AIIMS Trauma Centre ত ভৰ্তি কৰোৱা হয় ৷ অল আমিন নামৰ অন্য এজন ছাত্ৰই কয় যে, লোকজনে ধমকি প্ৰদান কৰাৰ লগতে 'এইয়া ল' স্বাধীনতা' বুলি চিঞৰিছিল ৷ দক্ষিণ-পূৱ দিল্লীৰ আৰক্ষী উপ-আয়ুক্ত চিন্ময় বিশ্বালে কয় যে, বন্ধুকধাৰীজনক আটক কৰাৰ লগতে সোধা-পোছা অব্যাহত আছে ৷

আৰু পঢ়ক : বড়ো শান্তি চুক্তিয়ে কেন্দ্ৰক শক্তিশালী কৰাৰ বিপৰীতে দুৰ্বল কৰিছে অসমক