নিউজ ডেস্ক, 27 অক্টোবৰ : দুগৰাকীকৈ বিদেশী বৈমানিকক লৈ দেওবাৰে মালদ্বীপৰ মালেৰ পৰা উৰা দেশৰ প্ৰথমখন ছী-প্লেন সোমবাৰে আহমেদাবাদত অৱতৰণ কৰে ৷ কেভাড়িয়া হৈ আহমেদাবাদত উপস্থিত হয় এই বিশেষ সাগৰীয় উৰাজাহাজখন ৷
দেশৰ প্ৰথমখন বাণিজ্যিক সাগৰীয় উৰাজাহাজে অহা 31 অক্টোবৰৰ পৰা নিজৰ সেৱা প্ৰদান কৰিব ৷ কেন্দ্ৰীয় চৰকাৰৰ উড়ান আঁচনিৰ অধীনত এই উৰাজাহাজখনে কাৰ্য সম্পাদন কৰিব ৷ গুজৰাটৰ সবৰমতী নদীৰ পৰা ষ্টেচু অৱ ইউনিটীলৈ সেৱা আগবঢ়াৱ এইখন ছী-প্লেনে ৷
প্ৰতিৰক্ষা বিভাগে প্ৰকাশ কৰা বিজ্ঞপ্তি অনুসৰি, স্পাইচজেটৰ অধীনৰ Twin Otter 300 সাগৰীয় উৰাজাহাজখন স্পাইচজেট টেকনিকৰ নামত পঞ্জীয়ন কৰা আছে ৷ উৰাজাহাজখনে আহমেদাবাদৰ পৰা কেভাড়িয়ালৈ প্ৰতিদিনে 8 বাৰকৈ প্ৰতিবাৰত 45 মিনিটৰ উৰণ সম্পন্ন কৰিব ৷ দুগৰাকী বিদেশী বৈমানিকে আগন্তুক 6 মাহৰ বাবে ভাৰতীয় বৈমানিকসকলক ইয়াত প্ৰশিক্ষণো প্ৰদান কৰিব ৷