পথ হেৰুওৱা চীনা নাগৰিকক উদ্ধাৰ কৰিলে ভাৰতীয় সেনাই

উত্তৰ ছিকিমত ১৭,৫০০ফুট উচ্চতাত অৱস্থিত মালভূমি অঞ্চলৰ পৰা ৩ গৰাকী চীনা নাগৰিকক উদ্ধাৰ কৰিলে ভাৰতীয় সেনাই। পথ ভুল হৈ দিশহাৰা হৈছিল চীনৰ নাগৰিক কেইজন। ভাৰতীয় সেনাই ততাতৈয়াকৈ তিনিওকে অক্সিজেন, খাদ্য আৰু গৰম কাপোৰৰ যোগান ধৰে।

নেশ্যনেল ডেস্ক, ৫ছেপ্টেম্বৰ: ভাৰত আৰু চীনৰ মাজত সীমা বিবাদ অব্যাহত থকাৰ মাজতে ভাৰতীয় সেনাই উত্তৰ ছিকিমত ১৭,৫০০ফুট উচ্চতাত অৱস্থিত মালভূমি অঞ্চলৰ পৰা ৩গৰাকী চীনা নাগৰিকক উদ্ধাৰ কৰে । যোৱা ৩ ছেপ্টেম্বৰত পথ ভুল হৈ অঞ্চলটোত আবদ্ধ হৈ পৰিছিল এগৰাকী মহিলাসহ আন দুগৰাকী চীনৰ নাগৰিক । এনে সময়তে ভাৰতীয় সেনাই সহায়ৰ হাত আগবঢ়ায় । শীঘ্ৰে সেই স্থানত সেনা জোৱান উপস্থিত হৈ নাগৰিক কেইজনৰ বাবে অক্সিজেনৰ ব্যৱস্থা কৰে । লগতে খাদ্য আৰু গৰম কাপোৰো যোগান ধৰা হয় ।

১৭,৫০০ফুট উচ্চতাত আবদ্ধ হৈ অসুবিধাৰ সন্মুখীন হোৱা নাগৰিককেইজনক চিকিৎসা প্ৰদানৰো ব্যৱস্থা কৰা হয় । ইয়াৰ পিছত নাগৰিককেইজনক সঠিক পথৰ বিষয়ে অৱগত কৰায় ভাৰতীয় সেনাই । চীনৰ নাগৰিককেইজনক কৰা সহায়ৰ বাবে ভাৰতীয় সেনাক ধন্যবাদ জ্ঞাপন কৰে । উল্লেখ্য যে, বিশেষ সূত্ৰই প্ৰকাশ কৰা তথ্য অনুসৰি ভাৰতৰ প্ৰতিৰক্ষা মন্ত্ৰী ৰাজনাথ সিং আৰু চীনৰ প্ৰতিৰক্ষা মন্ত্ৰীয়ে পূৱ লাডাখৰ উত্তেজনাপূৰ্ণ পৰিস্থিতিৰ বিষয়ে মস্কোত ২ ঘণ্টা জোৰা বৈঠকত মিলিত হয় ।