নেশ্যনেল ডেস্ক, 2 ফেব্ৰুৱাৰী :দেওবাৰে চীনৰ নাগৰিক আৰু দেশখনত বাস কৰা বিদেশীসকলৰ ই-ভিছা সাময়িকভাৱে স্থগিত ৰখাৰ সিদ্ধান্ত গ্ৰহণ কৰিছে ভাৰতে ৷ চীনত বিধংসী ৰূপ ধাৰণ কৰা কৰ'ণাভাইৰাছৰ প্ৰতি লক্ষ্য ৰাখি গ্ৰহণ কৰা হৈছে এই সিদ্ধান্ত ৷ উল্লেখ্য যে, চুবুৰীয়া দেশ চীনত এই ৰোগে বৰ্তমানলৈকে 300 তকৈও অধিক লোকৰ প্ৰাণ কাঢ়ি নিয়াৰ লগতে 14,000 লোক এই ৰোগত আক্ৰান্ত হৈছে ৷
ভাৰতীয় দূতাবাসে জানিবলৈ দিয়া অনুসৰি, বৰ্তমানৰ পৰিস্থিতিৰ প্ৰতি লক্ষ্য ৰাখি ভাৰতে অতি সোনকালে কাৰ্যকৰী হোৱাকৈ ই-ভিছা স্থগিত ৰাখিছে ৷ উল্লেখ্য যে, এই স্থগিতাকৰণ চীনৰ নাগৰিকৰ উপৰিও চীনত বাস কৰা অন্য দেশৰ লোকৰ বাবেও কাৰ্যকৰী হ'ব ৷ আনহাতে, যিসকলে ইতিমধ্যে ই-ভিছা লাভ কৰিছিল তেওঁলোকৰো ভিছা অবৈধ বুলি গণ্য কৰা হ'ব বুলি জানিবলৈ দিয়ে দূতাবাসে ৷ কিন্তু, যিসকল লোকে জৰুৰীকালীনভাৱে ভাৰত ভ্ৰমণ কৰিব লগা হয় তেওঁলোকে বেইজিংস্থিত ভাৰতীয় দূতাবাসত অথবা ছাংঘাইস্থিত বাণিজ্যিক দূতাবাসত যোগাযোগ কৰিব পাৰিব ৷ উল্লেখ্য যে, বৰ্তমানলৈকে ভাৰতে য়ুহানৰ পৰা 647 জন ভাৰতীয়ৰ লগতে 7 জন মালদ্বীপৰ নাগৰিকক বিশেষ বিমানেৰে ভাৰতলৈ ওভোটাই আনিছে ৷ এয়াৰ ইণ্ডিয়াৰ Jumbo B747 ৰ দুখন বিশেষ বিমানৰ জৰিয়তে এইসকল লোকক ভাৰতলৈ ওভোটাই অনা হয় ৷ শনিবাৰে 324 জন আৰু দেওবাৰে 323 জন ভাৰতীয় আৰু মালদ্বীপৰ নাগৰিকক ভাৰতলৈ অনা হয় ৷