নেশ্যনেল ডেস্ক, ২৯ ডিচেম্বৰ: ইংলেণ্ডৰ পৰা ভাৰতলৈ অহা বহু কেইগৰাকী যাত্ৰী COVID-১৯ৰ নতুন ষ্ট্ৰেইনৰ দ্বাৰা সংক্ৰমিত হোৱাৰ কথা পোহৰলৈ অহাৰ পিছতে অধিক তৎপৰ হৈ পৰিছে কেন্দ্ৰীয় চৰকাৰ । কেন্দ্ৰীয় বিমান পৰিবহণ মন্ত্ৰী হৰদীপ সিং পুৰীয়ে মঙলবাৰে সম্বোধন কৰা এক সংবাদমেলত কয় যে, 'ভাৰতলৈ ইংলেণ্ডৰ বিমান যাত্ৰা অস্থায়ীভাৱে নিষিদ্ধ কৰাৰ সময়সীমা বৃদ্ধি হোৱাতো উচিত বুলি ভাৱো' ।
দীঘলীয়া সময়ৰ বাবে নহ'লেও কিছুদিনৰ বাবে এই সময়সীমা বৃদ্ধিৰ পোষকতা কৰে বুলি মত প্ৰকাশ কৰে কেন্দ্ৰীয় মন্ত্ৰীগৰাকীয়ে । ইংলেণ্ডত COVID-১৯ৰ নতুন ষ্ট্ৰেইনৰ সংক্ৰমণ বৃদ্ধি হোৱাৰ বাবে যোৱা ২১ ডিচেম্বৰৰ পৰা ভাৰতলৈ দেশখনৰ বিমান অহাৰ ক্ষেত্ৰত বাধা আৰোপ কৰা হৈছিল । মঙলবাৰে ভাৰতত COVID-১৯ৰ নতুন ষ্ট্ৰেইনৰ দ্বাৰা ৬ জন লোক সংক্ৰমিত হোৱাৰ ঘটনা পোহৰলৈ আহে । এই নতুন ষ্ট্ৰেইনৰ ভাইৰাছ পূৰ্বৰ ভাইৰাছতকৈ ৭০ গুণ অধিক সংক্ৰমণ হয় । ইংলেণ্ডত ইয়াৰ প্ৰথমটো ঘটনা পোহৰলৈ আহিছিল ।