নেশ্যনেল ডেস্ক, 23 জানুৱাৰী :বাৰ্ষিক গণতন্ত্ৰ সূচকাংক, 2019 ত 10 টাকৈ স্থান অৱনমিত হৈ 52 সংখ্যক স্থান অধিকাৰ কৰিলে ভাৰতে ৷ The Economist Intelligence Unit ৰ মতে, 'নাগৰিকৰ স্বতন্ত্ৰতা' খৰ্ব হোৱাৰ পৰিপেক্ষিতত দেশৰ সূচকাংক এনেদৰে অৱনমিত হ'ল ৷
ভাৰতৰ সামগ্ৰিক নম্বৰ 2018 বৰ্ষৰ 7.23 ৰ পৰিৱৰ্তে 6.90 লৈ অৱনমিত হ'ল ৷ সৰ্বমুঠ 165 স্বাধীন ৰাষ্ট্ৰ আৰু দুই কেন্দ্ৰীয় শাসিত অঞ্চলৰ বাৰ্ষিক গণতন্ত্ৰ সূচকাংক প্ৰকাশ কৰাত এই তথ্য ফাদিল হয় ৷ উল্লেখ্য যে, পাঁচটা সূচীৰ ওপৰত ভিত্তি কৰি এই সূচকাংক প্ৰকাশ কৰা হয়- নিৰ্বাচনী প্ৰক্ৰিয়া আৰু বহুবাদ, চৰকাৰৰ কাৰ্য প্ৰণালী, ৰাজনৈতিক অংশগ্ৰহণ, ৰাজনৈতিক সংস্কৃতি আৰু নাগৰিকৰ স্বতন্ত্ৰতা ৷
দেশসমূহক চাৰি প্ৰকাৰৰ শাসন প্ৰক্ৰিয়াৰ ভিত্তিত বিভক্ত কৰা হৈছে - 'পূৰ্ণ গণতন্ত্ৰ'(8 তকৈ অধিক নম্বৰপ্ৰাপ্ত), ক্ৰটিপূৰ্ণ গণতন্ত্ৰ (6 তকৈ বেছি কিন্তু 8 তকৈ কম নম্বৰপ্ৰাপ্ত), অমাৰ্জিত শাসন (4 তকৈ বেছি কিন্তু 6 তকৈ কম) আৰু স্বেচ্ছাচাৰী শাসন (4 অথবা 4 তকৈ কম) ৷ এই প্ৰকাৰ অনুসৰি, ভাৰতক 'ক্ৰটিপূৰ্ণ গণতন্ত্ৰ'ত অন্তৰ্ভূক্ত কৰা হৈছে ৷ আনহাতে, এছিয়া আৰু অষ্ট্ৰেলিয়াৰ দেশসমূহৰ ভিতৰত ভাৰতে অষ্টম স্থান অধিকাৰ কৰিলেও তিমোৰ লেষ্টে, মালয়েছিয়া আৰু টাইৱানতকৈও পাচত স্থান লাভ কৰিছে ৷