নেশ্যনেল ডেস্ক, 15 জুলাই:মানৱ সম্পদ উন্নয়ন মন্ত্ৰণালয়ে মঙলবাৰে বিদ্যালয় সমূহৰ দ্বাৰা অনলাইন পাঠদানৰ কিছুমান নিৰ্দেশনা জাৰি কৰে । লগতে শিক্ষাৰ্থী সকলৰ বাবে এদিনৰ সময়সীমা আৰু ছেচনৰ সংখ্যা সম্পৰ্কেও এটি টোকা আগবঢ়ায় ।
'প্ৰজ্ঞাতা' নামৰ এক গাইডলাইনৰ জৰিয়তে মানৱ সম্পদ উন্নয়ন মন্ত্ৰণালয়ে প্ৰাক-প্ৰাথমিক পৰ্যায়ৰ শিক্ষাৰ্থী সকলৰ বাবে অনলাইন পাঠদানৰ সময় 30 মিনিটৰ অধিক নোহোৱাটো উচিত বুলি উল্লেখ কৰে ।
প্ৰথম শ্ৰেণীৰ পৰা অষ্টম শ্ৰেণীৰ শিক্ষাৰ্থীৰ বাবে 45 মিনিটৰ 2 টা ছেচন কৰিবলৈ নিৰ্দেশ প্ৰদান কৰে । আনহাতে নৱম শ্ৰেণীৰ পৰা দ্বাদশ শ্ৰেণীৰ শিক্ষাৰ্থী সকলৰ বাবে 30-45 মিনিটৰ 4 টা ছেচন কৰিবলৈ নিৰ্দেশ দিছে ।
অনলাইন পাঠদানৰ গাইডলাইন মুকলি মানৱ সম্পদ উন্নয়ন মন্ত্ৰণালয়ৰ অনলাইল ডিজিটেল শিক্ষণৰ বাবে এই নিৰ্দেশনাত 8 টা স্তৰ সন্নিবিষ্ট কৰা হৈছে । সেইয়া হ'ল- পৰিকল্পনা, পৰ্যালোচনা, ব্যৱস্থা, গাইড, আলোচনা, এচাইন, ট্ৰেক আৰু সহযোগিতা । এই স্তৰবোৰৰ মাজেৰে শিক্ষা আগুৱাই নিলে শ্ৰেণীবদ্ধভাৱে ডিজিটেল শিক্ষণৰ পৰিকল্পনা আৰু কাৰ্যকাৰিতাক নিৰ্দেশিত কৰিব ।
COVID-19 মহামাৰীৰ বাবে বন্ধ হৈ পৰিছে দেশৰ সকলো বিদ্যালয় । যাৰ ফলত দেশৰ 240 মিলিয়ন শিশুৰ ক্ষেত্ৰত ব্যাপক প্ৰভাৱ বিস্তাৰ কৰিছে । এনেদৰে বিদ্যালয় সমূহ বন্ধ হৈ থাকিলে ব্যাপক হাৰত শিক্ষাৰ লোকচান হ'ব পাৰে বুলি উল্লেখ কৰে মানৱ সম্পদ উন্নয়ন মন্ত্ৰণালয়ে ।
এই নিৰ্দেশনা শিক্ষাৰ্থীসকলৰ দৃষ্টিকোণেৰে বিকশিত কৰা হৈছে । ডিজিটেল শিক্ষণৰ এই নিৰ্দেশনাই বহু শিক্ষাৰ্থীৰ বাবে নিজৰ শিক্ষা আগুৱাই নিয়াৰ ক্ষেত্ৰত এক সংকেত প্ৰদান কৰিব ।
শিক্ষণৰ সময়কাল, স্ক্ৰীণিঙৰ সময়, অনলাইল আৰু অফলাইন ক্ৰিয়া কলাপ সমূহৰ ভাৰসাম্যতা বজাই ৰখা, বিৱৰণসহ ডিজিটেল শিক্ষণৰ যোজনা আদিৰ ক্ষেত্ৰত মূল্যাংকণৰ প্ৰয়োজন ।
ডিজিটেল শিক্ষণৰ সময়ত শাৰীৰিক, মানসিক স্বাস্থ্য আৰু সুস্থতা, চাইবাৰ সুৰক্ষা আৰু সহযোগিতা বৰ্তাই ৰখাৰ ক্ষেত্ৰত প্ৰশাসন, বিদ্যালয় প্ৰধান, শিক্ষক, অভিভাৱক আদিয়ে সতৰ্কতা আদি ভিন্ন বিষয়ত গুৰুত্ব প্ৰদান কৰিব লাগিব ।
অভিভাৱক সকলৰ বাবেও এই নিৰ্দেশনাত, ঘৰত শিশুক কেনেদৰে চাইবাৰ সুৰক্ষা প্ৰদান কৰিব, শাৰীৰিক-মানসিক স্বাস্থ্যৰ ক্ষেত্ৰত ব্যৱস্থা গ্ৰহণ কৰিব আদি বিষয়সমূহ সন্নিবিষ্ট আছে ।
শাৰীৰিক স্বাস্থ্য আৰু মানসিক কল্যাণৰ ক্ষেত্ৰত ল'ব পৰা ব্যৱস্থাৰ ক্ষেত্ৰত এই নিৰ্দেশনাত সকলো বিষয় উল্লেখ কৰা হৈছে । যাতে শিশুসকলে ডিজিটেল মাধ্যম অধিক সময় ব্যৱহাৰ কৰাৰ বাবে দৃষ্টিশক্তি হ্ৰাস আদিৰ দৰে অন্য শাৰীৰিক ঋণাত্মক দিশসমূহৰ দ্বাৰা প্ৰভাৱিত নহয় সেই বিষয়ত গুৰুত্ব প্ৰদান কৰা হৈছে বুলি উল্লেখ কৰে মন্ত্ৰণালয়ে ।
লগতে পঢ়কঃ: কোভিড-19 আক্ৰান্তৰ সংস্পৰ্শলৈ জীতেন্দ্ৰ সিং আৰু ৰাম মাধৱ, হোম কোৱাৰেন্টাইন
