নিউজ ডেস্ক, 29 জুলাইঃ জম্মু কাশ্মীৰৰ প্ৰাক্তন মুখ্যমন্ত্ৰী মেহবুবা মুফটিৰ বিতৰ্কিত মন্তব্যৰ পিচতে জাঙুৰ খাই উঠিল কেন্দ্ৰীয় মন্ত্ৰী গিৰিৰাজ সিং ৷ অনুচ্ছেদ 35(এ)ক লৈ কৰা বিতৰ্কিত মন্তব্যৰ পিচতে ইটিভি ভাৰতৰ আগত প্ৰতিক্ৰিয়া প্ৰকাশ কৰে কেন্দ্ৰীয় মন্ত্ৰীগৰাকীয়ে ৷
"একমাত্ৰ ভোটবেংকৰ ৰাজনীতিৰ বাবে জম্মু-কাশ্মীৰৰ দৰে ৰাজ্যত সন্ত্ৰাসবাদকে ধৰি বিচ্ছিন্নতাবাদী শক্তিসমূহক প্ৰশ্ৰয় দি আহিছে মেহবুবা মুফটিৰ দৰে তথাকথিত ৰাজনৈতিক নেতাসকলে ৷ কাশ্মীৰক ভাৰতৰ ছুইজাৰলেণ্ড হোৱাত নিজৰ ব্যক্তিগত স্বাৰ্থৰ বাবেই বাধা দি আহিছে একমাত্ৰ এইসকল নেতাই ৷ এনেকুৱা নেতাৰ প্ৰয়োজন আমাক নাই ৷" ইটিভি ভাৰতৰ আগত এইদৰে কয় কেন্দ্ৰীয় মন্ত্ৰীগৰাকীয়ে ৷
উল্লেখ্য যে, বিগত বৰ্ষৰ জুন মাহত জম্মু কাশ্মীৰ চৰকাৰৰ পৰা 25গৰাকীকৈ বিজেপি বিধায়কে সমৰ্থন উঠাই লৈছিল ৷ পৰৱৰ্তী সময়ত সংখ্যালঘু হৈ পৰা মেহবুবা মুফটি নেতৃত্বাধীন চৰকাৰখনে ইস্তফা দিবলৈ বাধ্য হৈছিল আৰু ডিচেম্বৰ মাহৰ পৰা ৰাজ্যখনত জাৰী কৰা হৈছিল ৰাষ্ট্ৰপতি শাসন ৷ শেহতীয়াকৈ দেশৰ গৃহমন্ত্ৰী আৰু প্ৰধানমন্ত্ৰীকে ধৰি জম্মু-কাশ্মীৰৰ শীৰ্ষ বিজেপি নেতাসকলে ৰাজ্যখনত বিধানসভা নিৰ্বাচন অনুষ্ঠিত কৰাৰ বাবে মঙলবাৰে আলোচনাত মিলিত হোৱাৰ তথ্য প্ৰকাশ কৰিছে বিজেপিৰ শীৰ্ষ সূত্ৰই ৷