নিউজ ডেস্ক, ১৪ ডিচেম্বৰ : দুই তৰপীয়া বিদেশ যাত্ৰাৰ অন্তিম স্তৰত ভাৰতীয় স্থল সেনা প্ৰধান জেনেৰেল মনোজ মুকুন্দ নাৰাভানে ছৌদি আৰৱত উপস্থিত হয় । ইয়াৰ পূৰ্বে তেওঁ সংযুক্ত আৰৱ ৰাষ্ট্ৰত উপস্থিত হৈছিল আৰু জেনেৰেল নাৰাভানে হৈছে দেশৰ একমাত্ৰ আৰু প্ৰথম শীৰ্ষ সামৰিক বিষয়া যিয়ে কূটনৈতিকভাৱে গুৰুত্বপূৰ্ণ দুয়োখন দেশ ভ্ৰমণ কৰে ।
দেওবাৰে স্থলসেনা প্ৰধান জেনেৰেল নাৰাভানে ছৌদি আৰৱৰ শীৰ্ষ সেনা বিষয়াসকলক সাক্ষাৎ কৰে । এই সাক্ষাৎকালত তেওঁ দুয়োখন দেশৰ উমৈহতীয়া আৰু দ্বিপাক্ষিক সামৰিক সম্পৰ্কত আলোচনাত মিলিত হয় ।
স্থলসেনাৰ এডিজি পিআই টুইটাৰত এই বিষয়ে এক টুইট কৰে । টুইটটোত ৰয়েল ছৌদি লেণ্ড ফ'ৰ্চেছৰ কামাণ্ডাৰ জেনেৰেল ফাহাদ বিন আব্দুল্লা মহম্মদ অল-মুটিৰ তথা চীফ অৱ জেনেৰেল ষ্টাফ জেনেৰেল ফায়াধ বিন হামিদ অল-ৰুৱাইলি আৰু যুটীয়া বাহিনীৰ কামাণ্ডাৰ লেফটেনেন্ট জেনেৰেল মুটলাক বিন চালিম বিন অল-আজিমাৰ সৈতে আলোচনাত মিলিত হোৱাৰ তথ্য প্ৰকাশ কৰে ।