নেশ্যনেল ডেস্ক, 1 ছেপ্টেম্বৰ :দেশৰ প্ৰাক্তন ৰাষ্ট্ৰপতি প্ৰণৱ মূৰ্খাৰ্জীৰ মঙলবাৰে অন্তিম সংস্কাৰ সম্পন্ন কৰা হ'ব ৷ নতুন দিল্লীস্থিত চৰকাৰী বাসগৃহত তেওঁৰ নশ্বৰ দেহত সকলোৱে অন্তিম শ্ৰদ্ধা প্ৰদানৰ সুবিধা লাভ কৰিব ৷
প্ৰতিৰক্ষা মন্ত্ৰণালয়ে জাৰি কৰা এক প্ৰতিবেদন অনুসৰি, চৰকাৰী বিষয়ববীয়া সকলক অন্তিম শ্ৰদ্ধা প্ৰদানৰ বাবে পুৱা 9:15 বজাৰ পৰা 10:15 বজালৈ সময় প্ৰদান কৰা হৈছে ৷ আনহাতে, অন্যান্য বিষয়ববীয়াৰ বাবে 45 মিনিটৰ সময় ধাৰ্য কৰি দিয়া হৈছে ৷ ইয়াৰ পাচতে 10 ৰাজাজী মাৰ্গত সাধাৰণ ৰাইজক অন্তিম শ্ৰদ্ধাঞ্জলীৰ সুবিধা প্ৰদান কৰা হ'ব ৷ ক'ভিড-19 প্ৰট'কল অনুসৰি প্ৰাক্তন ৰাষ্ট্ৰপতিগৰাকীৰ নশ্বৰ দেহ মৃতদেহ কঢ়িওৱা বাহনত লৈ যোৱা হ'ব ৷ এই সময়ছোৱাত ক'ভিড-19 ৰ সকলো নিৰ্দেশাৱলী মানি চলা হ'ব বুলি জানিবলৈ দিয়ে মন্ত্ৰণালয়ে ৷
উল্লেখ্য যে, সোমবাৰে আৰ আৰ আৰ্মী হাস্পতালত মূখাৰ্জীয়ে শেষ নিশ্বাস ত্যাগ কৰে ৷ অসুস্থতাৰ বাবে এই মাহৰ প্ৰথম ভাগতে তেওঁক হাস্পতালত ভৰ্তি কৰোৱা হৈছিল ৷ মৃত্যুৰ সময়ত তেওঁৰ বয়স আছিল 84 বছৰ ৷ 10 আগষ্টক তেওঁক আৰ্মী হাস্পতালত ভৰ্তি কৰোৱা হৈছিল আৰু ইয়াৰ পাচতে তেওঁ ক'ভিড-19 ত আক্ৰান্ত হোৱা বুলি জানিব পৰা গৈছিল ৷