নেশ্যনেল ডেস্ক,2 ফেব্ৰুৱাৰী :হায়দৰাবাদৰ পংকজ নামৰ এজন স্থানীয় যুৱকে মুকলি কৰে হায়দৰাবাদৰৰ প্ৰথমখন প্লাষ্টিক মুক্ত দোকান ৷ তিনিমাহ পূৰ্বে আৰম্ভ কৰা এই দোকানখন হায়দৰাবাদ চহৰৰ ছিকণ্ডৰাবাদত অৱস্থিত ৷ দোকানখনৰ পৰিচালক পংকজ বৃত্তিগতভাৱে এজন হিচাপ ৰক্ষক ৷ চেন্নাই ,ছিমলা আৰু বাংগালুৰু দেখি অহা প্লাষ্টিক মুক্ত দোকান সমূহৰ আৰ্হিত পংকজে হায়দৰাবাদ চহৰত মুকলি কৰে প্ৰথমখন প্লাষ্টিক মুক্ত দোকান ৷ চহৰৰ সমাজৰ বাবে অতিকৈ প্ৰয়োজনীয় বুলি বিবেচিত এনে প্লাষ্টিক মুক্ত দোকান ৷ এই দোকানখনৰ জৰিয়তে প্লাষ্টিক মুক্ত সামগ্ৰী ব্যৱহাৰ কৰা বা প্লাষ্টিক পেকেজিং সামগ্ৰীৰ ব্যৱহাৰ ৰোধ কৰাত প্ৰচাৰ কৰাৰ উপৰিও জৈৱিক সামগ্ৰী ব্যৱহাৰত গুৰুত্ব প্ৰদান কৰে পংকজে ৷
হায়দৰাবাদৰ প্ৰথমখন প্লাষ্টিক মুক্ত দোকান প্লাষ্টিক মুক্ত এই দোকানখনত চাউল, ঘেঁহু আদিকে ধৰি সকলো পণ্যজাতীয় সামগ্ৰীৰ লগতে ঘৰুৱা আচাৰ, চিপছ, চকলেট, বিস্কুট আদি সকলো সামগ্ৰী গ্লাছৰ কণ্টেইনাৰ বা ধাতুৰ পাত্ৰ বা বাকচ আদিত ৰাখে ৷ এই ব্যতিক্ৰমী দোকানখনে গ্ৰাহকক প্লাষ্টিক ব্যৱহাৰ নকৰাৰ বাবে অনুপ্ৰাণিত কৰাৰ লগতে ই সমাজলৈ প্লাষ্টিক ব্যৱহাৰ ৰোধ কৰাৰ বাৰ্তা প্ৰেৰণ কৰে ৷ দোকানত কফি, জৈৱক প্ৰক্ৰিয়াৰে তৈয়াৰী চাবোনৰ, চেম্পু আদিও কাগছৰ থোলাত ৰখা হয়৷ দোকানত উপলব্ধ হোৱা বেছিভাগ সামগ্ৰী ঘৰুৱাভাৱে মহিলাৰ দ্বাৰা তৈয়াৰী লগতে গ্ৰাহকে ক্ৰয় কৰা সামগ্ৰী নিবৰ বাবে মহিলাসকলে ঘৰত তৈয়াৰ কৰা এক বিশেষ কাপোৰৰ বেগ দোকানখনত উপলব্ধ ৷ দোকানখনত ভৰি থোৱাৰ লগে লগে দেৱালত লিখিত এটা শ্ল'গান দেখা পোৱা যায়, য'ত লিখা আছে, Say No To Plastic" ৷ ইয়াৰ উপৰিও প্ৰকৃতি বিষয়ক বহুতো শ্ল'গান দোকানখনৰ দেৱালত বা প'ষ্টাৰ হিচাপে লিখি ওলমাই ৰাখিছে ৷ লগতে দোকানখনৰ সাজসজ্জাই সহজে আপোনাক মুগ্ধ কৰি পেলোৱাৰ লগতে প্ৰকৃতিৰ প্ৰতি আকৰ্ষিত কৰি তুলিব ৷
দোকানখনৰ পৰিচালক পংকজে কয় যে, "দৈনন্দিন জীৱনত প্লাষ্টিক ব্যৱহাৰৰ কম কৰাৰ বাবে এয়া অতি সূক্ষ্ম অৱদান৷ সামগ্ৰীত প্লাষ্টিকৰ পেকেটিং ৰোধ কৰাৰ কৰাৰ লগতে গ্ৰাহকক প্লাষ্টিক মুক্ত সামগ্ৰী ব্যৱহাৰৰ কৰাৰ বাবে অনুপ্ৰাণিত কৰাৰ ক্ষেত্ৰত হায়দৰাবাদ চহৰত এয়াই প্ৰথম পদক্ষেপ ৷" দোকানখনৰ দ্বাৰা প্লাষ্টিক পেকেজিং সামগ্ৰী ব্যৱহাৰ ৰোধ কৰাক প্ৰচাৰৰ উপৰি জৈৱিক সামগ্ৰী ব্যৱহাৰতো গুৰত্ব প্ৰদান কৰা হৈছে ৷
দৈনন্দিন জীৱনত প্লাষ্টিকৰ ব্যৱহাৰ ৰোধ কৰি আমি এক স্বচ্চ,স্বাস্থ্যৱান জীৱনৰ অধিকাৰী হ'ব পাৰিম বুলি কয় কৰে পংকজে ৷ লগতে পংকজে বিশ্বাস কৰে যে গ্ৰাহক সকলে প্লাষ্টিক মুক্ত সামগ্ৰী ক্ৰয় কৰি তেওঁলোকে প্ৰকৃতিৰ প্ৰতি সৰু অৱদান আগবঢ়াৱ পাৰে ৷ দোকানখনত সামগ্ৰী ক্ৰয় কৰিবলৈ যোৱা গ্ৰাহক সকলক ঘৰৰ পৰা বেগ,মোনা আদি নিবলৈ অনুগ্ৰহ কৰা হয় ৷ অৱশ্যে গ্ৰাহকৰ সুবিধাৰ্থে দোকানখনত মহিলাসকলে ঘৰত তৈয়াৰ কৰা এক বিশেষ কাপোৰৰ বেগ ৰখা হয় ৷ উল্লেখ্য যে, গণেশ নামৰ ছফটৱেৰ ইঞ্জিয়াৰ এজন তদাৰকত নিৰ্মিত হয় উক্ত কাপোৰৰ বেগ সমূহ আৰু তেখেতে প্লাষ্টিক মুক্ত সমাজ গঢ় দিয়াৰ বাবে এই বেগ সমূহ বিনামূল্যে দান কৰে ৷
