নিউজ ডেস্ক, ২১ জুন : পিতৃ দিৱস পিতৃ সকলৰ সন্মানৰ বাবে উদযাপিত কৰা কৰা হয়। পিতৃ সকলৰ মৰম আৰু ত্যাগৰ স্বীকৃতি জনোৱাৰ উদ্দেশ্যে এই দিৱস উদযাপন কৰা হয় । বিভিন্ন দেশত বেলেগ বেলেগ দিনত এই দিৱস উদযাপন কৰা হয় কিন্তু ভাৰতকে আদি কৰি পৃথিৱীৰ প্ৰায়বোৰ দেশে পিতৃ দিৱস জুন মাহৰ তৃতীয় দেওবাৰত পালন কৰা হয় ।
এটা পৰিয়ালত পিতৃ-মাতৃৰ সহযোগ সমানেই যদিও বৰ্তমান বিশ্বত অধিক পৰিয়াল একক অভিভাৱক হিচাপে চলি আছে । ব্যক্তিগত বিভিন্ন কাৰণত তেওঁলোকে একক ভাৱেই সকলো দায়িত্ব পালন কৰি আহিছে । এক সমীক্ষা অনুসৰি, ২০১১ চনত আমেৰিকাত ২.৬ মিলিয়ন একক পৰিয়াল আছিল যিটো হাৰ ১৯৬০ গণনাৰ পিছত ন গুন বৃদ্ধি পাইছে । একেদৰে কানাডাত ৩৩০০০০ টা পৰিয়ালত অকল পিতৃৰ তত্বাবধানত চলি আছে । বিট্ৰেইনত প্ৰায় ৩ মিলিয়ন একক পৰিয়াল আছে ।
একক অভিভাৱক পৰিয়ালত এগৰাকী শিশু জন্ম হোৱাৰ পিছতে এজন পিতৃৰ নিজৰ দায়িত্ব আৰু কৰ্তব্য বহুগুনে বৃদ্ধি পায় ।
এজন পিতৃৰ প্ৰধান দায়িত্ব সমূহঃ
সহযোগঃ এটি শিশু জন্ম হোৱাৰ পিছতে এজন পিতৃৰ সহযোগিতা দুগুনে বৃদ্ধি পায় । সন্তানটিক ভাল মানুহ কৰাৰ স্বাৰ্থত পিতৃয়ে সদায় অহৰহ চেষ্টা কৰে । কঠিন পৰিস্থিতিতো নিজ সন্তানক বিপদত পৰিব নিদিয়াটো এজন পিতৃৰ মহানুভৱতা আৰু দায়িত্বক সূচাই ।
নিৰাপত্তাঃ হাজাৰ বিপদ হলেও নিজ সন্তানক বিপদত পৰিব নিদিয়াটো পিতৃৰ আন এটা প্ৰধান দায়িত্ব । নিজে নাখাই বা নিপিন্ধিও সন্তানৰ অভাৱ পূৰণ কৰিবলৈ প্ৰতিজন পিতৃয়ে সদায় চেষ্টা কৰে ।
অনুশাসনঃ পিতৃয়ে নিজৰ সন্তানক সদায় সু-শাসনৰ মাজত ৰাখিব বিচাৰে । পঢ়া শুনাৰ পৰা আদি কৰি সকলো নীতি শিক্ষা নিজৰ সন্তানটিক দিব বিচাৰে ।
অৰ্থৰ যোগানঃ পিতৃয়ে নিজৰ সন্তানক কেতিয়াও বিপদৰ সন্মুখীন হব'লৈ নিদিয়ে । সন্তানৰ হাজাৰটা অভাৱ পিতৃয়ে সদাই পূৰণ কৰিবলৈ চেষ্টা কৰে । প্ৰতিজন পিতৃয়ে সন্তানক সকলোতকৈ ভাল বস্তু খুৱাবলৈ বিচাৰে । এয়াই এজন পিতৃৰ মহানুভৱতা ।
গতিকে নিজে দুখ সহ্য কৰিও সন্তানক পৃথিবীৰ সকলো সুখ আনন্দ দিব বিচৰা জনেই পিতৃ । পিতৃৰ ঋণ কেতিয়াও আমি পূৰণ কৰিব নোৱাৰিম ।
আমাৰ বাবে সকলো দুখ কষ্টক মুৰ পাতি লোৱা পিতৃজনৰ বাবে আমি এই বিশেষ দিনটোত তেখেতক সুখী কৰিবলৈ চেষ্টা চলাব লাগে । পিতৃয়ে ভাল পোৱা বস্তু তেওঁক উপহাৰ হিচাপে প্ৰদান কৰি এই বিশেষ দিনটোত তেখেতক শুভেচ্চা জনাব পাৰি । এই বিশেষ দিনটোত তেখেতৰ লগত বাহিৰত এসাজ ভালকৈ খোৱাটোৱে হয়তো পিতৃজনক সুখী কৰি তুলিব পাৰে ।
আনহাতে, আপোনাৰ পিতৃজন প্ৰযুক্তি বিদ্যাৰ প্ৰতি জ্ঞাত হওক বা নহওক এই বিশেষ দিনটোত তেখেতক আধুনিক প্ৰযুক্তিৰ এটা মোবাইল বা লেপ'টপ উপহাৰে তেওঁক সীমাহীন আনন্দ দিব পাৰে । নাইবা আপুনি পিতৃ গৰাকীক এটা ভাল ঘড়ী বা সুন্দৰ ফটোৰ এটা এলবাম, স্বাস্থগত বিভিন্ন উপহাৰ প্ৰদান কৰিব পাৰে । যদিহে আপোনাৰ পিতৃয়ে পঢ়ি ভাল পায় তেতিয়াহলে তেওঁ ভাল পোৱা বিভিন্ন কিতাপ তেওঁক উপহাৰ হিচাপে প্ৰদান কৰিব পাৰে ।
