আৰক্ষীৰে হোৱা সংঘৰ্ষত নিহত নক্সালবাদী

ছত্তিশগড়ৰ ডান্টেৱাড়া জিলাত সংঘটিত হোৱা সংঘৰ্ষত নিহত হয় এগৰাকী নক্সালবাদী ৷ সংঘৰ্ষত এগৰাকী ডিআৰজি জোৱান সামান্য পৰিমানে আঘাতপ্ৰাপ্ত হোৱাৰ লগতে হৃদযন্ত্ৰ ক্ৰিয়া বন্ধ হৈ আন এগৰাকী জোৱান নিহত হয় ৷

নিউজ ডেস্ক, 8 অক্টোবৰঃ মঙলবাৰে ছত্তিশগড়ত মাওবাদীৰে সংঘৰ্ষত লিপ্ত হয় আৰক্ষী ৷ ৰাজ্যখনৰ ডান্টেৱাড়া জিলাৰ পিতেপাল গাঁৱত পুৱাৰ ভাগত সংঘৰ্ষত লিপ্ত হয় আৰক্ষী আৰু মাওবাদীৰ দলটো ৷

সংঘৰ্ষত এটা মাওবাদী নিহত হোৱাৰ লগতে এগৰাকী ডিআৰজি জোৱান সামান্য পৰিমানে আঘাতপ্ৰাপ্ত হয় ৷ আনহাতে সংঘৰ্ষ চলি থকাৰ সময়তে আন এগৰাকী ডিআৰজি জোৱানৰ হৃদযন্ত্ৰৰ ক্ৰিয়া বন্ধ হৈ মৃত্যু হয় ৷ নিহত হোৱা আৰক্ষী জোৱানজন সহকাৰী কনিষ্টবল কৈলাশ নেটাম বুলি জনাইছে আৰক্ষীয়ে ৷

ডান্টেৱাড়া আৰু চুকমা জিলাৰ সীমান্তৱৰ্তী কাটেকল্যান জংঘলত মাওবাদীৰ অৱস্থিতিৰ খবৰ লাভ কৰে আৰক্ষীয়ে ৷ পৰৱৰ্তী সময়ত চোৰাংচোৱাৰ তথ্যৰ ভিত্তিত জংঘলত অভিযান চলায় আৰক্ষীৰ ডিষ্ট্ৰিক ৰিজাৰ্ভ গাৰ্ডৰ এটা অভিযানকাৰী দলে ৷

আৰক্ষীৰ অভিযানৰ সময়তে দলটোলৈ বুলি গুলীচালনা কৰে মাওবাদীৰ দলটোৱে ৷ প্ৰত্যুত্তৰত আৰক্ষীয়েও গুলীচালনা কৰে আৰু এটা মাওবাদী ঘটনাস্থলীতে নিহত হয় ৷ আনহাতে ঘন জংঘলৰ সুবিধা লৈ মাওবাদীৰ দলটোৱে ঘটনাস্থলীৰ পৰা পলায়ন কৰিবলৈ সক্ষম হয় ৷ সংঘৰ্ষস্থলীৰ পৰা এটা দেশীয় পিষ্টলৰ লগতে দুটা মেগজিন আৰু এছএলআৰ ৰাইফল জব্দ কৰিবলৈ সক্ষম হয় আৰক্ষীয়ে ৷