গাজিয়াবাদৰ ৰাজপথত মৃতদেহ থৈ ক্ষতিপূৰণ দাবী পৰিয়ালৰ

গাজিয়াবাদৰ মুৰাদনগৰত ছাদ খহি ২৫ জন লোকে প্ৰাণ হেৰুওৱাৰ পিছতে সোমবাৰে ক্ষতিপূৰণৰ দাবীত প্ৰতিবাদ মৃতকৰ পৰিয়ালৰ । ৰাজপথতে ৪টাকৈ মৃতদেহ থৈ ১০ লাখ টকাৰ ক্ষতিপূৰণ দাবী কৰি ৫৮ নং ৰাষ্ট্ৰীয় ঘাইপথ অৱৰোধ কৰে আত্মীয় আৰু স্থানীয় লোকে । মুখ্যমন্ত্ৰী অথবা প্ৰধানমন্ত্ৰীৰ কাৰ্যালয়ৰ পৰা লিখিতভাৱে আশ্বাস পত্ৰ লাভ নকৰা পৰ্যন্ত তেওঁলোকে চৰকাৰী কৰ্তৃপক্ষৰ কথা বিশ্বাস নকৰে বুলি স্পষ্ট কৰি দিয়ে ।

নিউজ ডেস্ক, ৪ জানুৱাৰী: ক্ষতিপূৰণৰ দাবীত উত্তৰ প্ৰদেশৰ গাজিয়াবাদৰ মুৰাদনগৰত ৫৮ নং ৰাষ্ট্ৰীয় ঘাইপথ অৱৰোধ কৰে দেওবাৰৰ ঘটনাত মৃত্যু হোৱা লোকৰ পৰিয়াল আৰু স্থানীয় ৰাইজে । দেওবাৰে মুৰাদনগৰত শেষকৃত্য অনুষ্ঠানত অংশগ্ৰহণ কৰাৰ সময়তে ছাদ খহি ২৫ জন লোকে প্ৰাণ হেৰুৱায় আৰু ২০ জনকৈ লোক গুৰুতৰভাৱে আহত হয় । ধাৰাসাৰ বৰষুণত তিতাৰ পৰা ৰক্ষা পৰিবলৈ প্ৰায় ৫০ জন লোকে নতুনকৈ নিৰ্মাণ কৰা কৰিড'ৰ ভিতৰত আশ্ৰয় লৈছিল ।

আকস্মিকভাৱে কৰিড'ৰৰ ছাদ খহি পৰে। এই ঘটনাৰ পিছতে ৰাজ্য চৰকাৰে মৃতকৰ পৰিয়ালৈ ক্ষতিপূৰণ হিচাপে ২ লাখকৈ টকা আগবঢ়োৱাৰ কথা ঘোষণা কৰে । কিন্তু চৰকাৰৰ এই সিদ্ধান্তত অসন্তুষ্টি প্ৰকাশ কৰি মৃতকৰ পৰিয়ালে ক্ষতিপূৰণৰ ধন ১০ লাখ টকালৈ বৃদ্ধি কৰিবলৈ দাবী জনাই ৫৮ নং ৰাষ্ট্ৰীয় ঘাইপথ অৱৰোধ কৰে । আত্মীয়ই ৰাজপথতে ৪টাকৈ মৃতদেহ থৈ ক্ষতিপূৰণ বৃ্দ্ধিৰ দাবী জনায় । পথ অৱৰোধৰ ফলত ৰাজপথত যানজঁটৰ সৃষ্টি হয় ।

আনহাতে,মুখ্যমন্ত্ৰী অথবা প্ৰধানমন্ত্ৰীৰ কাৰ্যালয়ৰ পৰা লিখিতভাৱে আশ্বাস পত্ৰ লাভ নকৰা পৰ্যন্ত তেওঁলোকে চৰকাৰী কৰ্তৃপক্ষৰ কথা বিশ্বাস নকৰে বুলি স্পষ্ট কৰি দিয়ে । আনহাতে,ঘটনাস্থলীত কেইবাগৰাকীও চৰকাৰী বিষয়া উপস্থিত হৈ প্ৰতিবাদকাৰীসকলৰ সৈতে আলোচনা কৰে । আলোচনাৰ পিছত এটা পৰিয়ালে মৃতদেহ ৰাজপথৰ পৰা আঁতৰাই নিবলৈ সন্মত হয় যদিও আন পৰিয়ালকেইটাই প্ৰতিবাদ অব্যাহত ৰাখে ।

স্থানীয় লোকসকলৰ মতে,দেওবাৰৰ শোকাৱহ ঘটনাত পৰিয়ালকেইটাৰ মূল উপাৰ্জনকাৰীয়ে প্ৰাণ হেৰুৱাইছে । পৰিয়ালৰ মূল ব্যক্তিৰ মৃত্যুৱে ভয়াৱহ বিপদ মাতি আহিছে পৰিয়ালকেইটালৈ । সেয়ে,চৰকাৰক ক্ষতিপূৰণৰ ধনৰ পৰিমাণ বৃদ্ধিৰ দাবী জনাইছে ।

লগতে পঢ়ক:COVID-১৯ঃ দেশৰ ভিন্ন ৰাজ্যৰ সামগ্ৰিক তথ্য