নেশ্যনেল ডেস্ক, ২৮ অক্টোবৰ: দিল্লীত বুধবাৰে প্ৰদূষণৰ মাত্ৰা নিম্নগামী হৈছে। বতাহৰ গতিবেগ বৃদ্ধি পোৱাৰ বাবে প্ৰদূষণ হোৱা বুলি ধাৰণা কৰাৰ লগতে এই সকাহ ক্ষন্তেকীয়া হোৱাৰ আশংকা কৰিছে দিল্লী প্ৰদূষণ নিয়ন্ত্ৰণ সমিতিয়ে। পুৱা ১০ বজাত ৰাজধানী চহৰখনত বায়ুৰ গুণগত মানৰ সূচাংক ২৮১ আছিল আৰু ইয়াক সূচাংকৰ 'বেয়া' শ্ৰেণীত তালিকাভুক্ত কৰা হৈছে। ইয়াৰ পূৰ্বে বিগত ৫ দিন ধৰি বায়ুৰ গুণগত মানৰ সূচাংক 'বহুত বেয়া' শ্ৰেণীত আছিল।
মঙলবাৰে দিল্লীত বায়ুৰ গুণগত মানৰ সূচাংক আছিল ৩১২, সোমবাৰে ৩৫২, দেওবাৰে ৩৪৯, শনিবাৰে ৩৪৫ আৰু শুক্ৰবাৰে ৩৬৬ আছিল। বায়ুৰ গুণগত মানৰ সূচাংক ০-৫০ৰ ভিতৰত থাকিলে ভাল, ৫১-১০০ৰ ভিতৰত সন্তোষজনক, ১০১-২০০ৰ ভিতৰত মধ্যম, ২০১-৩০০ৰ ভিতৰত বেয়া, ৩০১-৪০০ৰ ভিতৰত বহুত বেয়া আৰু ৪০১-৫০০ৰ ভিতৰত থাকিলে জটিল পৰিস্থিতি বুলি গণ্য কৰা হয়।
ভাৰতৰ বতৰ বিজ্ঞান বিভাগৰ এগৰাকী জ্যেষ্ঠ বিজ্ঞানীয়ে প্ৰকাশ কৰিছে যে, 'বতাহৰ অনুকুল গতিয়ে মঙলবাৰে সন্ধিয়া প্ৰদূষণ হ্ৰাস কৰাত সহায় কৰিছে। বতাহৰ গতিবেগ হ্ৰাস হ'লে পুনৰ প্ৰদূষক জমা হ'ব আৰু বায়ুৰ গুণগত মানৰ সূচাংক নিম্নগামী হ'ব। বৃহস্পতিবাৰলৈকে সূচাংক 'বহুত বেয়া' শ্ৰেণীলৈ গতি কৰাৰ সম্ভাৱনা আছে। 'পৃথিৱী বিজ্ঞান বিভাগ মন্ত্ৰালয়ৰ বায়ুৰ মান পৰ্যবেক্ষকৰ মতে, দিল্লীৰ পি এম ২.৫ ঘনত্বত জ্বলা জাবৰৰ অংশ মঙলবাৰে ২৩ শতাংশ বৃদ্ধি পায় আৰু এয়া এইবাৰৰ আটাইতকৈ বেছি অংশ। সোমবাৰে এই পৰিমাণ ১৬ শতাংশ, দেওবাৰে ১৯ শতাংশ আৰু শনিবাৰে ৯ শতাংশ আছিল।