নিউজ ডেস্ক, ৩০ এপ্ৰিলঃ কৰ'ণা ভাইৰাছৰ সংহাৰী ৰূপ আৰু দেশত চলি থকা লক্ ডাউনৰ ফলতেই বন্ধ হৈ পৰিছে দেশৰ স্কুল-কলেজ । কিন্তু লক্ ডাউনৰ মাজতেই শিক্ষাৰ্থীৰ সুবিধাৰ্থে দিল্লী চৰকাৰে দূৰদৰ্শন আৰু অল ইণ্ডিয়া ৰেডিঅ'ক প্ৰতিদিনে ৩ ঘণ্টাৰ শিক্ষা শ্ৰেণীৰ সম্প্ৰচাৰ কৰাৰ আহ্বান জনাইছে ।
বিষয়ববীয়া সকলৰ মতে, লক্ ডাউনত কিছু শিথিলতা অনা হৈছে যদিও বিদ্যালয় ইত্যাদি পুনৰ খুলি পাঠদান আৰম্ভ কৰাৰ ক্ষেত্ৰত প্ৰয়োজন হ'ব অধিক সময়ৰ । যাৰ বাবে দূৰদৰ্শন, অল ইণ্ডিয়া ৰেডিঅ'ৰ জৰিয়তে পাঠদানৰ কাৰ্যসূচী সম্প্ৰচাৰ কৰি শিক্ষাৰ্থী সকলক উপকৃত কৰিব পৰা যাব ।
সেয়েহে শিক্ষা বিভাগৰ উচ্চ পদস্থ বিষয়াই কেন্দ্ৰক স্কুল-কলেজ পুনৰ আৰম্ভ নোহোৱা পৰ্যন্ত দূৰদৰ্শন আৰু অল ইণ্ডিয়া ৰেডিঅ'ত ৩ ঘণ্টীয়া পাঠদানৰ অনুমতি বিচাৰি আবেদন জনায় ।
দিল্লী চৰকাৰে ইতিমধ্য়ে অনলাইন ক্লাছৰ ব্যৱস্থা হাতত লৈছে । জানিব পৰা মতে, ৬৮ শতাংশ ছাত্ৰ-ছাত্ৰীৰ হাতত হে স্মাৰ্টফোন আছে । যাৰ বাবে সকলোকে শিক্ষাদানৰ বাবে এই সিদ্ধান্ত গ্ৰহণ কৰি কেন্দ্ৰক এই বিষয়ে প্ৰস্তাৱ প্ৰেৰণ কৰা কৰিছে । ইতিমধ্যে দূৰদৰ্শন কেন্দ্ৰৰ পৰা কৰ্ণাটক, তেলেংগানা, অন্ধ্ৰপ্ৰদেশ, তামিল নাডু, কেৰালা, গুজৰাট, জম্মু-কাশ্মীৰত ডিজিটেল ক্লাছৰ সম্প্ৰচাৰ কৰি থকা হৈছে । আনহাতে অল ইণ্ডিয়া ৰেডিঅ'ৰ ফালৰ পৰাও বহু কেইটা অঞ্চলক সাঙুৰি ভাৰ্চুৱেল ক্লাছৰ সম্প্ৰচাৰ কৰা হৈছে ।
