কোভিড প্ৰতিষেধকঃ ভাৰতৰ সিদ্ধান্তক প্ৰশংসা বিশ্ব স্বাস্থ্য় সংস্থাৰ

ভাৰতীয় ড্ৰাগ নিয়ন্ত্ৰণকাৰী সংস্থা ডিজিচিআইয়ে দুটাকৈ ভাৰতীয় প্ৰতিষেধকৰ টীকাকৰণত জৰুৰীকালীন অনুমোদন জনোৱাৰ পাচতেই ভাৰত চৰকাৰৰ সিদ্ধান্তক আদৰণি জনায় বিশ্ব স্বাস্থ্য সংস্থাই ৷

নিউজ ডেস্ক, 3 জানুৱাৰী :ভাৰত চৰকাৰে টীকাকৰণৰ ক্ষেত্ৰত গ্ৰহণ কৰা সিদ্ধান্তৰ পাচতেই এই সিদ্ধান্তক আদৰণি জনাইছে বিশ্ব স্বাস্থ্য সংস্থাই ৷ দক্ষিণ-পূব এছিয়াৰ ভিতৰত ভাৰতে গ্ৰহণ কৰা জৰুৰীকালীন টীকাকৰণে সমগ্ৰ অঞ্চলটোতে কোভিড-19ৰ বিৰুদ্ধে যুঁজ দিয়াত সহায় কৰিব বুলি উল্লেখ কৰিছে বিশ্ব স্বাস্থ্য সংস্থাই ৷ বিশ্ব স্বাস্থ্য সংস্থাৰ দক্ষিণ-পূব এছিয়াৰ আঞ্চলিক মহানিৰ্দেশক ডাঃ পুনম ক্ষেত্ৰপালে সংবাদ মাধ্যমৰ আগত দেওবাৰে প্ৰকাশ কৰে এই কথা ৷

ভাৰতীয় ড্ৰাগ নিয়ন্ত্ৰণ সংস্থাই দেওবাৰে অক্সফ'ৰ্ডৰ কোভিড-19 প্ৰতিষেধক তথা চিৰাম ইনষ্টিটিউটে প্ৰস্তুত কৰা কোভিশ্বীল্ড আৰু ভাৰত বায়’টেকৰ কোভাক্সিনৰ জৰুৰীকালীন ব্যৱহাৰত পূৰ্ণ অনুমতি প্ৰদান কৰিছে ৷ ভাৰতে ইতিমধ্যে কোভিড-19ৰ প্ৰতিষেধক টীকাকৰণৰ কাম আৰম্ভ কৰিছে আৰু ইয়াৰ বাবে প্ৰাৰম্ভিক পৰ্যায়ত প্ৰায় 83 কোটি প্ৰতিষেধকৰ অৰ্ডাৰ কৰিছে কেন্দ্ৰীয় স্বাস্থ্য মন্ত্ৰণালয়ে ৷

উল্লেখ্য যে, ভাৰত বায়’টেকৰ দ্বাৰা নিৰ্মিত কোভিড-19 প্ৰতিষেধক কোভাক্সিনলৈ কেন্দ্ৰই জৰুৰীকালীন ব্যৱহাৰৰ বাবে শনিবাৰে অনুমোদন জনাইছিল ৷ ইয়াৰ উপৰিও চিৰাম ইনষ্টিটিউট, পুণেত প্ৰস্তুত কৰা কোভিড-19 প্ৰতিষেধকলৈয়ো জৰুৰীকালীন ব্যৱহাৰৰ অনুমোদন দিয়াৰ লগতে আহমেদাবাদস্থিত কাদিলা হেল্থকেয়াৰে প্ৰস্তুত কৰা প্ৰতিষেধকৰ তৃতীয় পৰ্যায়ৰ ক্লিনিকেল পৰীক্ষণত অনুমোদন জনাইছিল কেন্দ্ৰই ৷ কেন্দ্ৰীয় চৰকাৰে ইতিমধ্য়েই সমগ্ৰ দেশতে কোভিড-19 প্ৰতিষেধকৰ টীকাকৰণ আৰম্ভ কৰিছে ৷ প্ৰথম পৰ্যায়ত দেশৰ বিভিন্ন ৰাজ্যৰ প্ৰায় 30 কোটি জনতাক প্ৰতিষেধক প্ৰদান কৰাৰ লগতে এই টীকাকৰণত 1 কোটি হেল্থকেয়াৰ ৱৰ্কাৰ, 2 কোটি ফ্ৰন্টলাইন আৰু অত্যাৱশ্যকীয় ৱৰ্কাৰৰ লগতে 50 বছৰৰ উৰ্ধৰ 27 কোটি লোকক টীকাকৰণ কৰিছে ৷

লগতে পঢ়ক :জৰুৰীকালীন অৱস্থাত ব্যৱহাৰ কৰিবলৈ কোভাক্সিনলৈ অনুমোদন কেন্দ্ৰৰ