নিউজ ডেস্ক, 1 মাৰ্চঃসপোনৰ পম খেদি ঘৰ এৰা ছোৱালীজনী কেনেকুৱা হ’ব, কেনেদৰে যুঁজে, সমস্যাবোৰৰ সৈতে যুঁজ দি, সংগ্ৰাম কৰি, অভ্যন্তৰীণ প্ৰতিবন্ধকতাবোৰক মষিমূৰ কৰি তাই কি অনুভৱ কৰে তাকে লৈ বহুতে চিন্তা কৰিবলগীয়া হয় । নিঃস্বাৰ্থভাৱে পতিক সহায় কৰা পত্নীগৰাকী, তেওঁৰ গ্লোভযোৰেৰে বক্সিং ৰিঙত যাতে ত্ৰিৰংগাই আধিপত্য বিস্তাৰ কৰে সেয়া নিশ্চিত কৰা মাতৃগৰাকী দেশৰ কমেও আধাসংখ্যক জনগণৰ হ’লেও আদৰ্শৰ প্ৰতীক ।
তেওঁৰ আজি জন্মদিন তথা আন্তঃৰাষ্ট্ৰীয় নাৰী দিৱসৰ প্ৰাকক্ষণত আহক এইগৰাকী মহিলা বক্সাৰৰ যাত্ৰাৰ বিষয়ে অৱলোকন কৰোঁ । তেওঁ কেৱল পদ্মবিভূষণ প্ৰাপ্ত প্ৰথম মহিলা খেলুৱৈয়েই নহয়, আনকি বক্সিং ৰিঙত আঠবাৰৰ বিশ্ব চেম্পিয়ন ।
মণিপুৰৰ চূড়চান্দপুৰ জিলাত ১৯৮৩ চনৰ ১ মাৰ্চত মেৰী কমে জন্ম গ্ৰহণ কৰিছিল । তেওঁৰ পিতৃ-মাতৃ দুয়োগৰাকীয়ে খেতিয়ক । মেৰী কমৰ প্ৰকৃত নাম মাংটে চুংনিচুং মেৰী কম । কিন্তু তেওঁৰ অনুৰাগীসকলে মৰমতে তেওঁক এম চি মেৰী কম বুলি কয় । বৰ্তমানৰ ৰাজ্যসভাৰ সাংসদগৰাকীয়ে বহু প্ৰতিবন্ধকতা আৰু সংগ্ৰামৰ পাছত তেওঁৰ জীৱনত তথা ৰাজহুৱাভাৱে এই স্থানত উপনীত হ’বলৈ সক্ষম হৈছে ।
সংগ্ৰামক বিজয়লৈ যিয়ে কৰিছে ৰূপান্তৰঃ
শিশু মেৰী কমে পিতৃ-মাতৃৰ সৈতে খেতিপথাৰলৈ গৈ খেতি-বাতিত সহায় কৰি দিছিল । শৈশৱৰ আদৰ্শ ডিংকো সিঙৰ অনুপ্ৰেৰণাতে তেওঁ বক্সিঙৰ প্ৰতি আকৰ্ষিত হয় ।অধ্যয়নত বৰ বেছি ভাল নোহোৱা মেৰী কম সদায় খেলৰ প্ৰতি গভীৰভাৱে আগ্ৰহী আৰু জড়িত আছিল । ৭ বছৰ বয়সত ভৰি দি বক্সিং ৰিঙৰ শীৰ্ষত উপনীত হৈ মেৰী কমে অনুভৱ কৰে যে, তেওঁ পঢ়া-শুনাও ভালদৰে কৰিব পাৰিলেহেঁতেন যদিও এফালে পৰিয়ালৰ পৰা প্ৰত্যাখ্যিত হৈছিল আৰু আনফালে মূৰত আৰ্থিক সমস্যাৰ বোজা আছিল । সাহসী আৰু দৃঢ়মনা পোন্ধৰ বছৰীয়া ছোৱালীজনীয়ে গ্লোভছ্ যোৰৰ সৈতে যাত্ৰা আৰম্ভ কৰিছিল আৰু পৰিয়ালৰ লোকসকলেও অৱশেষত মেৰী কমৰ উচ্চাকাংক্ষাক গ্ৰহণ কৰিবলৈ বাধ্য হৈছিল । এনেদৰে তেওঁৰ ঐতিহাসিক আন্তঃৰাষ্ট্ৰীয় যাত্ৰা ২০০১ চনত আৰম্ভ হয় ।
এগৰাকী ‘ছুপাৰ মম’ হিচাপে মেৰী কমঃ
প্ৰতিগৰাকী সফল নাৰীৰ আঁৰত এজন পুৰুষ থাকে । মেৰীৰ বাবে সেই পুৰুষজন তেওঁৰ স্বামী অনলাৰ । অনলাৰ এগৰাকী বিখ্যাত ফুটবল খেলুৱৈ । পতি অনলাৰে মেৰীক সহায় কৰাই নহয়, তেওঁ অতিশয় স্মাৰ্টো ।২০০৫ চনত মেৰী আৰু অনলাৰে যুগ্মজীৱনৰ পাতনি মেলে । এইক্ষেত্ৰত মেৰী কমৰ প্ৰশিক্ষকসকল আশাহত হৈ পৰিছিল কিয়নো বিয়াৰ পাছত মেৰীয়ে বক্সিং ত্যাগ কৰিব বুলি তেওঁলোকে ভাবিছিল । কিন্তু তেওঁৰ সংকল্প আৰু দৃঢ়তাৰে পৃথিৱীখনক সলনি কৰি দিয়াৰ সাক্ষী হৈ ৰ’ল সময় ।
বিয়াৰ দুবছৰ পাছত এইগৰাকী মাতৃয়ে যমজ সন্তানৰ জন্ম দিয়ে । সিহঁতৰ জন্মৰ পাছত অনলাৰে ঘৰৰ দায়িত্ব লয় আৰু মেৰী কমে বক্সিং ৰিঙলৈ উভতি আহিবলৈ প্ৰশিক্ষণত নামি পৰে । তেওঁৰ ঐতিহাসিক প্ৰত্যাৱৰ্তনৰ পাছত দুটি সন্তানৰ মাতৃগৰাকীয়ে এনেদৰে যুঁজিবলৈ লয় যেন তেওঁ কাহানিও বক্সিং ৰিঙৰ পৰা আঁতৰত নাছিল । এনেদৰে মেৰী কমে দেশৰ বাবে চতুৰ্থটো বিশ্ব চেম্পিয়নৰ সোণৰ পদক আজুৰি আনে । এইগৰাকী মাতৃক ‘ছুপাৰ মম’ হিচাপে কোৱাৰ মূল কাৰণ হৈছে মাতৃত্ব লাভৰ পাছতহে তেওঁ অধিকাংশ সন্মান অৰ্জন কৰিছে ।