নিউজ ডেস্ক, 10 জানুৱাৰী : ক’ৰণা মহামাৰীৰ সংক্ৰমণৰ প্ৰতি লক্ষ্য ৰাখি ওড়িশাৰ জগন্নাথ মন্দিৰত প্ৰৱেশৰ ক্ষেত্ৰত জাৰি কৰা নিষেধাজ্ঞা কিছু শিথিল কৰিছে প্ৰশাসনে ৷ জগন্নাথ মন্দিৰ দৰ্শনৰ বাবে অহা তীৰ্থযাত্ৰীসকলে ২১ জানুৱাৰীৰ পৰা ক’ভিড 19ৰ প্ৰমাণ পত্ৰৰ অবিহনে মন্দিৰৰ ভিতৰত প্ৰৱেশ কৰিব পাৰিব ৷ দেওবাৰে অনুষ্ঠিত এখন উচ্চস্তৰীয় বৈঠকৰ পাছত জগন্নাথ মন্দিৰৰ মুখ্য প্ৰশাসক কৃষ্ণ কুমাৰে এই কথা জানিবলৈ দিয়ে ৷
জগন্নাথ মন্দিৰত প্ৰৱেশৰ ক্ষেত্ৰত বাধ্যতামূলক নহ’ব ক’ভিড পৰীক্ষণ - ক’ৰণা মহামাৰী
কৰ’ণা মহামাৰীৰ বাবে সুদীৰ্ঘ 9 মাহ বিৰতিৰ পাছত 3 জানুৱাৰীৰ পৰা ভক্তৰ বাবে মুকলি কৰা হৈছিল ওড়িশাৰ পুৰীস্থিত জগন্নাথ মন্দিৰৰ দ্বাৰ ৷ মন্দিৰ দৰ্শনৰ বাবে অহা ভক্তসকলে ক'ভিড পৰীক্ষা কৰাটো অনিবাৰ্য আছিল । তদুপৰি প্ৰতিদিনে প্ৰায় ১৫ হাজাৰৰ পৰা ১৭ হাজাৰ দৰ্শনাৰ্থীয়ে মন্দিৰ দৰ্শনৰ অনুমতি লাভ কৰিছিল ৷
জগন্নাথ মন্দিৰত প্ৰৱেশৰ ক্ষেত্ৰত বাধ্যতামূলক নহ’ব ক’ভিড পৰীক্ষণ
মন্দিৰৰ মুখ্য প্ৰশাসক কৃষ্ণ কুমাৰে লগতে কয় যে জগন্নাথ মন্দিৰ দৰ্শনৰ বাবে অধিক সংখ্যক ভক্তৰ আগমণ আৰু ভক্তৰ সুবিধাৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হৈছে ৷ অৱশ্যে বয়োজ্যেষ্ঠ ব্যক্তিৰ প্ৰৱেশৰ ক্ষেত্ৰত জাৰি কৰা নিষেধাজ্ঞা মন্দিৰ প্ৰশাসনে উঠাই লৈছে যদিও তেওঁলোকৰ বাবে বিশেষ ব্যৱস্থা গ্ৰহণ কৰা হৈছে ৷ তদুপৰি মন্দিৰৰ পৰিস্কাৰ পৰিচ্ছন্নতা অব্যাহত ৰখাৰ বাবে দেওবাৰৰ দিনটোত মন্দিৰ বন্ধ ৰখা হ’ব ৷ ইয়াৰ উপৰি প্ৰতিদিনে ক’ভিড প্ৰ’টকলৰ মাজেৰে প্ৰায় 30 হাজাৰ ভক্তই মন্দিৰ দৰ্শন কৰাৰ ব্যৱস্থা কৰিছে প্ৰশাসনে ।
লগতে পঢ়ক : দিল্লীত 16 জানুৱাৰীৰ পৰা আৰম্ভ হ’ব ক’ৰণাৰ টীকাকৰণ