নিউজ ডেস্ক, ১০ মে' :ভাৰতত বৃহৎ বিত্তীয় তথা আৰ্থিক প্ৰোৎসাহনৰ প্ৰয়োজন আছে, কোভিড-১৯ৰ বাবে অৰ্থনীতিৰ নিম্নগামী ধাৰাৰ সৈতে মোকাবিলা কৰিবলৈ এই কথা উল্লেখ কৰে বিশ্ববেংকৰ প্ৰাক্তন অৰ্থনীতিবিদ কৌশিক বসুৱে । দেওবাৰে এই কথা প্ৰকাশ কৰাৰ লগতে তেওঁ কয় যে, ৰিজাৰ্ভ বেংক অৱ ইণ্ডিয়াৰ দ্বাৰা চৰকাৰে মুদ্ৰাকৰণৰ ওপৰত অধিক গুৰুত্ব প্ৰদান কৰিব লাগিব ।
এক সাক্ষাৎকাৰত বসুৱে কয় যে, ভাৰতত অসমতা বহু পৰিমানে আছে আৰু কোভিড-১৯ৰ ফলত ই আৰু অধিক বৃদ্ধি পাব । বিশ্বৰ অৰ্থনীতিৰ ওপৰত ক'লা মেঘৰ ছায়া পৰিছে আৰু ভাৰতেও ইয়াৰ পৰা সাৰি যাব নোৱাৰে ।
"আমাক এক বৃহৎ বিত্তীয় প্ৰোৎসাহনৰ প্ৰয়োজন আছে । ভাৰতৰ হাতত বিত্তীয় ব্যৱস্থাপনা আৰু চৰকাৰে যাতে অধিক খৰচ নকৰে তাক লক্ষ্য কৰিবলৈ FRBM Act, 2003ৰ দৰে আইন আছে । কিন্তু ই হৈছে এখন অতি উন্নত আইন যিয়ে, প্ৰাকৃতিক দুৰ্যোগৰ সময়ত আমাক অধিক ঘাটি গ্ৰহণ কৰিবলৈ অনুমতি প্ৰদান কৰে", বুলি তেওঁ উল্লেখ কৰে ।
শুকুৰবাৰে Moody's Investors Serviceএ উল্লেখ কৰে যে, ২০২১ বিত্তীয় বৰ্ষত ভাৰতৰ জনমুৰি আয়ে শূণ্যৰ ঘৰ চুব আৰু ৰাজহ ঘাটি বহুপৰিমানে বৃদ্ধি পাব, চৰকাৰৰ ধাৰ বৃদ্ধি হ'ব তথা সামাজিক আৰু বাহ্যিক আন্তঃগাঁথনি দুৰ্বল হৈ পৰাৰ লগতে বিত্তীয় খণ্ডটো ভংগ হৈ পৰিব । এইক্ষেত্ৰত কেন্দ্ৰই ৰাজ্যসমূহক অধিক বিনিয়োগ কৰিবলৈ অনুমতি দিব লাগিব বুলি বসুৱে প্ৰকাশ কৰে । দেশত মুদ্ৰাকৰণৰ প্ৰয়োজন সন্দৰ্ভত ৰিজাৰ্ভ বেংকে অধিক টকা চপা কৰিব লাগিব যদিও তাক অধিক বহুলভাৱে গ্ৰহণ কৰিব লাগিব বুলি কয় অৰ্থনীতিবিদগৰাকীয়ে ।