নেশ্যনেল ডেস্ক, 2 মে' : 17 মে'লৈ লকডাউন বৃদ্ধি কৰাৰ পৰিপ্ৰেক্ষিতত দেশীয় আৰু আন্তৰাষ্ট্ৰীয় বিমানৰ চলাচলতো বাধা আৰোপ কৰিছে বিমান মন্ত্ৰণালয়ে ৷ শনিবাৰে মন্ত্ৰণালয়ে প্ৰকাশ কৰে যে, 17 মে'লৈ সকলো দেশীয় আৰু আন্তৰাষ্ট্ৰীয় বিমানৰ চলাচল নিষিদ্ধ কৰা হৈছে ৷
Directorate General of Civil Aviation য়ে কয়, "1 মে', 2020 অনুসৰি গৃহ মন্ত্ৰণালয়ৰ 40-3/2020-DM-A(A) নম্বৰৰ নিৰ্দেশৰ জৰিয়তে 17 মে'লৈ সকলো দেশীয় আৰু আন্তৰাষ্ট্ৰীয় বিমানৰ চলাচলত প্ৰতিবন্ধকতা আৰোপ কৰা হৈছে ৷"
ইয়াৰোপৰি, 14 এপ্ৰিলত জাৰি কৰা ছাৰ্কুলাৰৰ বৈধতা বৃদ্ধি কৰাৰো সিদ্ধান্ত গ্ৰহণ কৰা হৈছে বুলি মন্তব্য কৰিছে DGCA য়ে ৷
DGCA ৰ ছাৰ্কুলাৰ অনুসৰি, "দেশীয় আৰু আন্তৰাষ্ট্ৰীয় এয়াৰলাইনছ সমূহক পুনৰ সেৱা আৰম্ভ হোৱা সম্পৰ্কত অৱগত কৰা হ'ব ৷ কিন্তু, সকলো আন্তৰাষ্ট্ৰীয় কাৰ্গো বিমান সমূহত এই নিষেধাজ্ঞা আৰোপ কৰা নাই ৷"
উল্লেখ্য় যে, কৰ'ণা ভাইৰাছৰ আতংকৰ পৰিপ্ৰেক্ষিতত 25 মাৰ্চৰ পৰা দেশীয় আৰু আন্তৰাষ্ট্ৰীয় ব্যৱসায়িক যাত্ৰীবাহী বিমানৰ চলাচলত বাধা আৰোপ কৰিছিল কেন্দ্ৰীয় চৰকাৰে ৷