কোভিড-19: ৰাজস্থানত চিকিৎসকৰ নিৰীক্ষণত আৰক্ষীক HCQ দিবলৈ নিৰ্দেশনা জাৰী

ৰাজস্থানৰ স্বাস্থ্য বিভাগে জাৰী কৰা এক নিৰ্দেশনা অনুসৰি, ৰাজ্যখনত কৰ্তব্য সমাপন কৰি থকা আৰক্ষীৰ লোকসকলক চিকিৎসকৰ নিৰ্দেশত HCQ অৰ্থাৎ হাইড্ৰক্সিক্লৰ’কুইনৰ প্ৰতিষেধক প্ৰদান কৰিবলৈ কোৱা হৈছে ৷

নিউজ ডেস্ক, 11 এপ্ৰিলঃ সমগ্ৰ দেশতে কৰ’ণা ভাইৰাছৰ প্ৰকোপ অব্যাহত আছে ৷ কৰ’ণা ভাইৰাছৰ বিৰুদ্ধে জাৰী থকা যুঁজখন চলাই নিছে দেশৰ আৰক্ষী আৰু স্বাস্থ্যকৰ্মীৰ লগতে অন্যান্য অত্যাৱশ্যকীয় সেৱাত জড়িত থকা লোকসকলে ৷ সদ্যহাতে কৰ’ণা ভাইৰাছক লৈ সমগ্ৰ বিশ্বতে চৰ্চালৈ আহে ভাৰতবৰ্ষ ৷ বিশেষকৈ হাইড্ৰক্সিক্লৰ’কুইনৰ বাবে সমগ্ৰ বিশ্বতে সমাদৰ লাভ কৰে ভাৰতে ৷

শেহতীয়াকৈ ভাৰতত আৱিষ্কৃত হাইড্ৰক্সিক্লৰ’কুইনক লৈ ৰাজস্থান চৰকাৰে জাৰী কৰিছে এক নিৰ্দেশনা ৷ নিৰ্দেশনাটোত স্বাস্থ্য বিভাগৰ লগতে আৰক্ষী বিভাগৰ কথা উল্লেখ কৰিছে চৰকাৰে ৷ সেই অনুসৰি, স্বাস্থ্য় বিভাগৰ তীক্ষ্ণ নিৰীক্ষণত ৰাজস্থানৰ কৰ’ণা আক্ৰান্ত অঞ্চলসমূহত কৰ্মৰত আৰক্ষীৰ ব্যক্তিসকললৈ নিৰ্দেশনাটোত অধ্যাদেশ জাৰী কৰা হৈছে ৷

ৰাজ্যখনৰ স্বাস্থ্য আৰু চিকিসা বিভাগৰ অতিৰিক্ত মুখ্য সচিব, ৰোহিত কুমাৰে প্ৰকাশ কৰা অনুসৰি, ৰাজস্থানৰ কৰ’ণা আক্ৰান্ত অঞ্চলসমূহত দায়িত্ব পালন কৰি থকা আৰক্ষীৰ লোকসকলক এতিয়াৰে পৰা প্ৰদান কৰা হ’ব হাইড্ৰক্সিক্লৰ’কুইন ৷ ৰাজ্যখনৰ জ্যেষ্ঠ চিকিৎসকসকলৰ নিৰীক্ষণত আৰক্ষীৰ লোকসকলক পালন কৰা হ’ব এই প্ৰতিষেধক ৷ শুকুৰবাৰে ৰাজ্যখনত জাৰী কৰা হয় এই বিশেষ নিৰ্দেশনা ৷