চুইমিং পুলত সময় কটোৱা বাবে মন্ত্ৰীক বৰ্খাস্ত কৰাৰ দাবী কংগ্ৰেছৰ

কৰ্ণাটক কংগ্ৰেছে টুইটাৰযোগে চিকিৎসা তথা শিক্ষামন্ত্ৰী কে সুধাকৰক দ্বায়িত্বজ্ঞানহীন কামৰ বাবে বৰ্খাস্ত কৰাৰ দাবী জনাই । উল্লেখ্য যে, COVID-19 মহামাৰীৰ সময়তো চুইমিং পুলত সময় কটাই আছিল মন্ত্ৰীগৰাকীয়ে ।

নিউজ ডেস্ক, 13 এপ্ৰিলঃ কৰ্ণাটক কংগ্ৰেছে টুইটাৰযোগে মুখ্যমন্ত্ৰী বি এচ এডিইৰাপ্পাক চিকিৎসা তথা শিক্ষা মন্ত্ৰী কে সুধাকৰক বহিস্কাৰ কৰিবলৈ দাবী জনাইছে । মন্ত্ৰীজনৰ বিৰুদ্ধে দ্বায়িত্বজ্ঞানহীনতাৰ অভিযোগ উত্থাপন কৰি COVID-19ৰ সময়ত চুইমিং পুলত সময় কটোৱাৰ কথা উল্লেখ কৰে ।

কৰ্ণাটকৰ কংগ্ৰেছ সভাপতি ডি কে শিৱকুমাৰে টুইটত লিখে যে, সমগ্ৰ বিশ্বই স্বাস্থ্য সংকটত ভোগাৰ সময়ত দ্বায়িত্বজ্ঞানহীনতাৰ পৰিচয় দি ডা৹ সুধাকৰে চুইমিং পুলত সময় কটাইছে । এইটো নীতি আৰু আদৰ্শৰ পৰিপন্থী । সেয়ে তেওঁ নিজাকৈ পদত্যাগ কৰিব লাগে বা মুখ্যমন্ত্ৰীয়ে কেবিনেটৰ পৰা বৰ্খাস্ত কৰিব লাগে ।

সুধাকৰ, যিয়ে ৰাজ্যখনত কৰ'ণা ভাইৰাচৰ বিৰুদ্ধে যুঁজখনত অন্যতম অগ্ৰণী ভূমিকা লৈছে, তেওঁ দেওবাৰে পুত্ৰৰ লগত চুইমিং পুলত থকা ফটো এখন টুইটাৰত পোষ্ট কৰে ।

তাৰ পিচতে এই কাৰ্যৰ বাবে মন্ত্ৰীগৰাকী ছ'চিয়েল মাধ্যমত যথেষ্ট সমালোচনাৰ সন্মুখিন হয় ।