নেশ্যনেল ডেস্ক, 13 নৱেম্বৰঃ উচ্চতম ন্যায়ালয়ে বুধবাৰে এক ঐতিহাসিক ৰায়দান প্ৰদান কৰে ৷ এই ৰায়দানযোগে তথ্য জনা অধিকাৰ আইনৰ অধীনলৈ অনা হয় উচ্চতম ন্যায়ালয়ৰ মুখ্য ন্যায়াধীশৰ কাৰ্যালয় ৷ ৰায়দানত কোৱা হয় যে মুখ্য ন্যায়াধীশৰ কাৰ্যালয় এক ৰাজহুৱা প্ৰতিষ্ঠান আৰু ই আইনৰ উৰ্দ্ধত নহয়, আইনৰ অধীনত হে ৷ মুখ্য ন্যায়াধীশ ৰঞ্জন গগৈয়ে অধ্যক্ষতা কৰা বিচাৰপীঠখনত আছিল ন্যায়াধীশ এন ভি ৰামানা, ন্যায়াধীশ ডি ৱায় চন্দ্ৰচূড়, ন্যায়াধীশ দীপক গুপ্তা আৰু ন্যায়াধীশ সঞ্জীৱ খান্না ৷
তথ্য জনা অধিকাৰ আইনৰ অধীনত উচ্চতম ন্যায়ালয়ৰ মুখ্য ন্যায়াধীশৰ কাৰ্যালয় উচ্চতম ন্যায়ালয়ে ৰায়দান কৰি কয় যে মুখ্য ন্যায়াধীশৰ কাৰ্যালয় ৰাজহুৱা পুনৰীক্ষণৰ অধীনত আৰু সেইবাবে ই এক ৰাজহুৱা প্ৰতিষ্ঠান ৷ মুখ্য ন্যায়াধীশৰ কাৰ্যালয়ক ৰাজহুৱা পুনৰীক্ষনলৈ অনাৰ বাবে পোন প্ৰথমবাৰৰ বাবে আৰ টি আই কৰ্মী এচ চি আগৰৱালাই 2010 চনত আবেদন জনাইছিল ৷ এই গোচৰ এপ্ৰিল মাহতে অন্ত পৰিছিল যদিও ইয়াৰ ৰায়দান বিচাৰপীঠে দিয়া নাছিল ৷ ইয়াৰ পূৰ্বেও 2010ৰ 10 জানুৱাৰীত দিল্লী উচ্চ ন্যায়ালয়ে এক ৰায়দান যোগে কৈছিল যে তথ্য জনা অধিকাৰ আইনৰ অধীনত উচ্চতম ন্যায়ালয়ৰ মুখ্য ন্যায়াধীশৰ কাৰ্যালয় ৷ দিল্লী উচ্চ ন্যায়ালয়ে কৈছিল যে ন্যায়িক স্বাধীনতা এজন ন্যায়াধীশৰ বিশেষাধিকাৰ নহয় ই এক দায়িত্বহে ৷ তিনিজনীয়া ন্যায়াধীশৰ বিচাৰপীঠে এই ৰায়দান দিছিল ৷ বিচাৰপীঠত আছিল মুখ্য ন্যায়াধীশ এ পি শ্বাহ, ন্যায়াধীশ বিক্ৰমজিৎ সেন আৰু ন্যায়াধীশ এচ মুৰুলিধৰ ৷
তথ্য জনা অধিকাৰ আইনৰ অধীনত উচ্চতম ন্যায়ালয়ৰ মুখ্য ন্যায়াধীশৰ কাৰ্যালয় কি হয় তথ্য জনা অধিকাৰ?
তথ্য জনা অধিকাৰ সংসদত গৃহীত হৈছিল 15 জুন 2005ত আৰু ই আইন হিচাপে প্ৰণয়ন হৈছিল 13 অক্টোবৰ 2005ত ৷ এই আইন অনুসৰি দেশখনৰ নাগৰিকসকলে যি কোনো ৰাজহুৱা প্ৰতিষ্ঠানৰ তথ্য জানিব পাৰিব ৷ তথ্য জনা অধিকাৰ আইনখনে তথ্য জনা স্বাধীনতা আইন 2002ৰ সলনি প্ৰযোজ্য কৰা হৈছিল ৷ আইনখন প্ৰণয়ন হোৱাৰ 10 বছৰৰ ভিতৰত 1,75,00,000 খন আবেদন দাখিল হৈছে ৷ কিষাণ মজদুৰ শক্তি সংগঠনে আইনখন প্ৰণয়ন কৰাত গুৰুত্বপূৰ্ণ ভুমিকা পালন কৰিছিল ৷
তথ্য জনা অধিকাৰ আইনৰ অধীনত উচ্চতম ন্যায়ালয়ৰ মুখ্য ন্যায়াধীশৰ কাৰ্যালয় কি কৰে তথ্য জনা অধিকাৰে?
এই আইনৰ দ্বাৰা এক সময়সীমাৰ ভিতৰত তথ্য যোগান ধৰিব লাগিব ৷ চৰকাৰৰ কাম আৰু ৰাজহুৱা প্ৰতিষ্ঠানৰ তথ্য জানিব পাৰিব আবেদনকাৰীয়ে ৷ ইয়াৰ বাবে পঞ্চায়তৰ পৰা প্ৰধানমন্ত্ৰী কাৰ্যালয়লৈকে এজন গণ তথ্য বিষয়া(Public Information Officer) থাকে ৷
2009 চনৰ নৱেম্বৰ মাহত Central Information Commission (CIC)য়ে উচ্চতম ন্যায়ালয়ক বিচাৰ প্ৰক্ৰিয়াৰ তথ্য ৰাজহুৱা কৰিবলৈ নিৰ্দেশ দিছিল ৷ 2018 চনৰ 17 আগষ্টত এখন তিনিজনীয়া বিচাৰপীঠে সমগ্ৰ বিষয়টো এখন পাচঁজনীয়া বিচাৰপীঠলৈ প্ৰেৰণ কৰে ৷ এপ্ৰিল 4 2019ত বিচাৰপীঠে ৰায়দান স্থগিত ৰাখে ৷ 2019 চনৰ ফেব্ৰুৱাৰী মাহত উচ্চতম ন্যায়ালয়ে তথ্য জনা অধিকাৰ গণতন্ত্ৰৰ এক অবিচেদ্দ অংগ বুলি মন্তব্য কৰে ৷
