নিউজ ডেস্ক ,৩ জানুৱাৰী:ছট্টিশগড়ৰ গৰীয়াবন্দ জিলাত হীৰা চিণ্ডিকেট চক্ৰৰ সৈতে জড়িত এজন ব্যক্তিক গ্ৰেপ্তাৰ কৰে আৰক্ষীয়ে । ৬২ বছৰীয়া লোকজনৰ পৰা আৰক্ষীয়ে ২২ লাখতকৈও অধিক মূল্য়ৰ হীৰা উদ্ধাৰ কৰিবলৈ সক্ষম হয় । এগৰাকী আৰক্ষী বিষয়াই জনোৱা মতে লোকজনৰ পৰা প্ৰায় ২২১ টা টুকুৰা ৰুক্ষ হীৰা জব্দ কৰা হৈছে । লোকজন চুবুৰীয়া মহাচামুন্দ জিলাৰ পিথোৰা অঞ্চলৰ বাসিন্দা অৰবিন্দ প্ৰধান বুলি চিনাক্ত কৰা হৈছে । আৰক্ষীয়ে মঙলবাৰে চুৰা আৰক্ষী থানা অঞ্চলৰ অন্তৰ্গত মংৰা গাঁৱৰ ওচৰত আটক কৰে হীৰাৰ চোৰাং সৰবৰাহৰ সৈতে জড়িত এই ব্যক্তি গৰাকীক ।
এক গোপন সূত্ৰৰ ভিত্তিত আৰক্ষীয়ে অভিযান চলাই লোকজনৰ পৰা বিভিন্ন আকাৰৰ হীৰা উদ্ধাৰ কৰাৰ লগতে এখন মটৰ চাইকেলো জব্দ কৰিছে । আৰক্ষীৰ প্ৰাথমিক তদন্তত পোহৰলৈ অহা মতে তেওঁ ৰাজধানী ৰায়পুৰৰ পৰা প্ৰায় ২০০ কিলোমিটাৰ দূৰত অৱস্থিত পায়ালিখণ্ড অঞ্চলৰ পৰা হীৰাবোৰ অবৈধভাৱে আনিছিল আৰু ইয়াক বিক্ৰী কৰাৰ পৰিকল্পনা কৰিছিল । অভিযুক্ত লোকজনৰ বিৰুদ্ধে এটা গোচৰ ৰুজু কৰিছে আৰক্ষীয়ে ।