নিউজ ডেস্ক, ৯ এপ্ৰিলঃ কেন্দ্ৰীয় চৰকাৰে বৃহস্পতিবাৰে COVID-19 ৰ সৈতে যুঁজিবলৈ বিভিন্ন ৰাজ্যলৈ ১৫০০০ কোটি টকাৰ বিশেষ জৰুৰীকালীন সাহাৰ্য অনুদানৰ ঘোষণা কৰে ।
কেন্দ্ৰীয় স্বাস্থ্য মন্ত্ৰণালয়ে বৃহস্পতিবাৰে দেশৰ প্ৰত্যেকখন ৰাজ্য আৰু কেন্দ্ৰীয় শাষিত অঞ্চলৰ মুখ্য সচিব,আয়ুক্ত (স্বাস্থ্য) ক পত্ৰ লিখি কেন্দ্ৰীয় চৰকাৰে আগবঢ়োৱা ধনৰাশি শীঘ্ৰে মোকলাই দিব বুলি সদৰী কৰে ।
স্বাস্থ্য মন্ত্ৰণালয়ৰ বিষয়াৰ ভাষ্য অনুসৰি, এই সাহাৰ্য অনুদান COVID-19ৰ সৈতে যুঁজিবলৈ বিভিন্ন ৰাজ্যসমূহৰ বাবে কেন্দ্ৰীয় চৰকাৰৰ দ্বাৰা আগবঢ়োৱা এটি সম্পূৰ্ণ বিত্তীয় সাহাৰ্য অনুদান ।
এই সাহাৰ্য অনুদান আগবঢ়োৱাৰ উদ্দেশ্যে এইটো যে, কৰ'ণা ভাইৰাছ প্ৰতিৰোধ তথা তাৰ উপস্থিতিৰ মাধ্যমসমূহ নাশ কৰা তথা সীমিত কৰা আৰু জৰুৰীকালীন পৰিস্থিতিত তাক ব্যৱহাৰ কৰা । তাৰোপৰি কৰ'ণা ভাইৰাছত আক্ৰান্ত ৰোগীসকলৰ বাবে অত্যাৱশ্যকীয় সামগ্ৰী ক্ৰয় কৰিবলৈও এই সাহাৰ্য অনুদান আগবঢ়ায় কেন্দ্ৰই ।
আনহাতে, এই সাহাৰ্য পুঁজিৰ দ্বাৰা ভৱিষ্যতে যাতে এই ৰোগ বৃদ্ধি নাপায় তাৰোপৰি ৰাজ্যৰ স্বাস্থ্য প্ৰণালী সমূহ উন্নত কৰিবলৈ ৰাজ্য সমূহলৈ কেন্দ্ৰীয় চৰকাৰে এই সাহাৰ্য অনুদান আগবঢ়ায় ।
উল্লেখ্য যে, স্বাস্থ্য মন্ত্ৰণালয়ে ইয়াৰ পূৰ্বেও বিভিন্ন ৰাজ্য আৰু কেন্দ্ৰীয় শাষিত অঞ্চললৈ ৪১১৩ কোটি টকাৰ অনুদান আগবঢ়াইছিল ।
