নেশ্যনেল ডেস্ক,৮ছেপ্টেম্বৰ: সুশান্ত সিং ৰাজপুতৰ আকস্মিক মৃত্যুৱে সমগ্ৰ দেশৰ লগতে অভিনেতাজনৰ জন্মস্থান পাটনাৰ লাখ লাখ অনুৰাগীক শোকবিহ্বল কৰি তুলিছে । সোমবাৰে বিহাৰৰ মুখ্যমন্ত্ৰী নিতিশ কুমাৰে ভাৰ্চুৱেল ৰেলীৰ ভাষণত সুশান্তৰ প্ৰসংগ উত্থাপন কৰি কয় যে, অভিনেতাগৰাকীৰ মৃত্যুৰ আঁৰৰ ৰহস্য আৰু ন্যায় সুনিশ্চিত কৰাৰ বাবে CBIৰ তদন্ত অব্যাহত আছে ।
বিহাৰৰ বিধানসভা নিৰ্বাচনৰ বাবে জনতা দল(ইউনাইটেড)ৰ হৈ প্ৰচাৰ অভিযান চলোৱাৰ সময়তে এক ঘণ্টাৰ বাবে বক্তব্য আগবঢ়ায়, য'ত সুশান্তৰ মৃ্ত্যু সন্দৰ্ভত তেওঁ শোক প্ৰকাশ কৰাৰ লগতে ন্যায়ৰ আশ্বাস দিয়ে । তেওঁ কয় যে, যুৱ অভিনেতাজনৰ মৃত্যুৱে কেৱল তেওঁৰ পৰিয়ালকে দুখিত কৰা নাই, বৰঞ্চ বিহাৰ আৰু আন স্থানত বাস কৰা লাখ লাখ অনুৰাগীৰ মনত শোকৰ ছাঁ পেলাইছে । লগতে নিতিশ কুমাৰে শিৱসেনালৈ আক্ৰমনাত্মক মন্তব্য কৰি কয়, মুম্বাইত উচিত তদন্ত হোৱা নাই বুলি সন্দেহ প্ৰকাশ কৰি সুশান্তৰ পিতৃ কে কে সিঙে পাটনাত এজাহাৰ দাখিল কৰিছিল ।