নিউজ ডেস্ক, ৭ এপ্ৰিলঃৰাজস্থানত দিনক দিনে বৃদ্ধি পাইছে কৰ'ণা ভাইৰাছত আক্ৰান্তৰ সংখ্যা । ৰাজ্য়খনৰ ৰাজধানী চহৰত সংহাৰী ৰূপ ধাৰণ কৰিছে COVID-19 য়ে । আনহাতে আটাইতকৈ শোচনীয় পৰিস্থিতিৰ সন্মুখীন হৈছিল ৰাজ্যখনৰ ভীলৱাড়া জিলা ।
জিলাখনৰ যি কেইজন লোকক COVID-19 ৰ পৰীক্ষা কৰা হৈছিল সকলোৰে ফলাফল পজিটিভ পোৱা গৈছিল । ইয়াৰ লগে-লগে জিলা প্ৰশাসনৰ সন্মুখত আহি পৰিছিল দুটাকৈ প্ৰত্যাহ্বান । আক্ৰান্তৰ সংখ্যা ৰোধ কৰাৰ লগতে আটাইতকৈ ক্ষতিগ্ৰস্থ হোৱা অঞ্চলৰ পৰা জিলাখনৰ নাম বাদ পেলোৱাৰ ।
বৰ্তমানে জিলাখনত নাই এজনো ৰোগী । সকলো আক্ৰান্ত ব্যক্তিক চিকিৎসা প্ৰদানৰ পাচত সুস্থ কৰি ঘৰলৈ যাবলৈ দিয়া হৈছে । যিটো বহু জিলা তথা জিলা প্ৰশাসনৰ বাবে এতিয়া প্ৰেৰণা হৈ পৰিছে ।
জিলা প্ৰশাসনে সময়তেই এই ভাইৰাছক ৰোধ কৰিবলৈ বহু কেইটা গুৰুত্বপূৰ্ণ পদক্ষেপ হাতত লৈছিল । ইয়াৰ ভিতৰত আছিল সান্ধ্য আইনৰ পাচতে জিলাত লক্ ডাউন ঘোষণা কৰা । প্ৰশাসনে জৰুৰী সকলো পদক্ষেপ হাতত লৈছিল যাৰ দ্বাৰা নাগৰিকৰ সহায় হয় । জিলাখনৰ সকলো সীমান্তও বন্ধ কৰা হৈছিল । আনহাতে নাগৰিকৰ পূৰ্ণ সহযোগিতা লাভ কৰিছিল ।
আনহাতে স্বাস্থ্য বিভাগে যিমান পাৰি সিমান লোকক টেষ্ট কৰাৰ ব্য়ৱস্থা কৰিছিল । জিলাখনত প্ৰায় ৮ লাখ লোকক টেষ্ট কৰা হৈছিল । জিলা, স্বাস্থ্য বিভাগৰ এই কষ্টৰ পৰিণতিতেই বৰ্তমান কৰ'ণা মুক্ত ভীলৱাড়া জিলা । জিলাখনত শেষবাৰৰ বাবে যোৱা ৩০ মাৰ্চত ধৰা পৰিছিল COVID-19 ত আক্ৰান্তৰ ঘটনা ।
লগতে চাওক- ভ্ৰমণ তথ্য গোপনীয় ৰখা অপৰাধাত ১৬ জনৰ বিৰুদ্ধে গোচৰ ৰুজু
