২২ হাজাৰ টকাত ২ মহীয়া সন্তানক বিক্ৰী ! গ্ৰেপ্তাৰ পিতৃ-মাতৃ

তেলেংগানাত পোহৰলৈ আহিছে এক অমানৱীয় ঘটনা । ২২ হাজাৰ টকাত বিক্ৰী কৰিছিল নিজৰ ২ মহীয়া পুত্ৰ সন্তানক । আৰক্ষীয়ে গ্ৰেপ্তাৰ কৰিলে দম্পতীক ।

হায়দৰাবাদ, ২৫ মে': আশ্চৰ্যকৰ ! ২২ হাজাৰ টকাত বিক্ৰী নিজৰ ২ মহীয়া এটি পুত্ৰ সন্তানক । তেলেংগানাত সংঘটিত হৈছে এই হৃদয় বিদাৰক ঘটনাটো । অৱশ্যে দেওবাৰে আৰক্ষীয়ে কণমানী শিশুটোক উদ্ধাৰ কৰিবলৈ সক্ষম হোৱাৰ লগতে গ্ৰেপ্তাৰ কৰে দম্পতীক ।

আৰক্ষীৰ প্ৰাৰম্ভিক তদন্তত পোহৰলৈ আহিছে যে, শনিবাৰে নিশা দম্পতীয়ে বিক্ৰী কৰিছিল ২ মহীয়া শিশুটিক । দম্পতীৰ এইটো আছিল দ্বিতীয়টো সন্তান । পৰিয়ালৰ আৰ্থিক দুৰাৱস্থা আৰু পিতৃৰ সুৰাপান কৰাৰ অভ্য়াসৰ বাবেই পুত্ৰ সন্তানটিক বিক্ৰী কৰা হৈছিল বুলি আৰক্ষীক জানিবলৈ দিয়ে সন্তানটিৰ মাতৃয়ে । আৰক্ষীয়ে পিচত শিশুটিক ক্ৰয় কৰা মহিলাগৰাকীৰ পৰা উদ্ধাৰ কৰি শিশু কল্যাণ কমিটিৰ জিম্মালৈ প্ৰদান কৰে ।

উল্লেখ্য় যে, দম্পতিয়ে চুবুৰীয়াৰ এগৰাকী মহিলাক ২২ হাজাৰ টকাত বিক্ৰী কৰিছিল দুই মহীয়া সন্তানটোক । মহিলাগৰাকীয়ে সন্তানটোক নিজৰ ভগ্নীক দিয়াৰ উদ্দেশ্য় ক্ৰয় কৰিছিল বুলি জানিবলৈ দিয়ে । লগতে শিশুটি ক্ৰয় কৰাৰ বাবদ এখন চুক্তিপত্ৰতো স্বাক্ষৰ কৰা হৈছিল । তাৰ পাচতেই শনিবাৰে শিশুটি মহিলাগৰাকীয়ে গ্ৰহণ কৰা বুলি জনাই আৰক্ষীয়ে ।

দেওবাৰে শিশুটিক হাস্পতাললৈ নিয়াৰ সময়ত ক্ৰয় কৰা মহিলাগৰাকীক গ্ৰেপ্তাৰ কৰা হৈছিল । ক্ৰয় কৰা মহিলা সহ শিশুটিৰ পিতৃ-মাতৃকো গ্ৰেপ্তাৰ কৰাৰ লগতে চুক্তি পত্ৰত স্বাক্ষৰিত সময়ত সাক্ষী থকা তিনি পলাতক অপৰাধীকো বিচাৰি আৰক্ষীয়ে অনুসন্ধান অব্যাহত ৰাখিছে ।