নিউজ ডেস্ক, ১৭ জুন: তিনিচুকীয়া জিলাৰ বাঘজান তৈল কুণ্ডৰ সমীপত এখন বেইলী ব্ৰীজ নিৰ্মাণৰ বাবে ভাৰতীয় সেনাৰ দলে সমীক্ষা চলোৱা আৰম্ভ কৰিছে । ভাৰতীয় তৈল নিগমৰ বিষয়ববীয়াই মঙলবাৰে সদৰী কৰে এই কথা ।
বিগত ২০ দিন ধৰি বাঘজানত নিৰ্গত হোৱা অনিয়ন্ত্ৰিত গেছৰ ফলত ভয়াৱহ অগ্নিকাণ্ডৰ ঘটনা সংঘটিত হয় । এই বিস্ফোৰণৰ পিছতে পি এছ ইউৰ মেজৰক অৱহেলাৰ অভিযোগ উত্থাপন কৰি জনসাধাৰণৰ আন্দোলন অব্যাহত থকা সন্দৰ্ভত কোম্পানীয়ে কয় যে, ২৭ মে'ৰ পৰা তেওঁলোকে ৫,৮৪৪ মেট্ৰিক টন কেঁচা তেল আৰু ৭.৫৩ মিলিয়ন মেট্ৰিক ষ্টেণ্ডাৰ্ড কিউবিক মিটাৰ (MMSCM) সঞ্চিত উৎপাদনৰ লোকচানৰ সন্মুখীন হ'বলগীয়া হয় ।
২৭ মে'ৰ বিস্ফোৰণৰ ঘটনাৰ পিছত অইল কোম্পানীয়ে জানিবলৈ দিয়ে যে, ১,৬১০ৰো অধিক পৰিয়ালক এই ক্ষেত্ৰৰ পৰা উলিয়াই অনা হৈছে আৰু ৪টা বেলেগ বেলেগ আশ্ৰয় শিবিৰত থাকিবলৈ দিয়া হৈছে, য'ত কৰণা ভাইৰাছৰ বিৰুদ্ধে সতৰ্কতাও অৱলম্বন কৰা হৈছে । অসামৰিক প্ৰশাসনৰ দ্বাৰা তৈল কুণ্ডৰ সমীপত ১৫০ মিটাৰ দৈৰ্ঘৰ বেইলী ব্ৰীজ নিৰ্মাণৰ ভাৰতীয় সেনাৰ সহায় বিচৰাৰ পিছতে সেনাৰ তিনিটা দলে সেই স্থানৰ সমীক্ষাত নামি পৰিছে ।