নিউজ ডেস্ক, 26 জুলাইঃ দৰিদ্ৰ শ্ৰমিকক বিমানেৰে ঘৰলৈ পঠিয়াই ৰাষ্ট্ৰজুৰি প্ৰসংসা বুটলিবলৈ সক্ষম হোৱা চনু চুড পুনৰ এবাৰ আগবাঢ়ি আহিল অন্ধ প্ৰদেশৰ দৰিদ্ৰ কৃষক পৰিয়াল এটাক সহায় কৰিবলৈ ৷ অভিনেতা জনে অন্ধ প্ৰদেশৰ চিত্তোৰ জিলাস্থিত কৃষক পৰিয়ালটোক প্ৰদান কৰে এখন ট্ৰেক্টৰ ৷
অভিনেতা গৰাকীয়ে ছ’চিয়েল মিডিয়াত ভাইৰেল হৈ পৰা এটা ভিডি’অ পত্যক্ষ কৰে ৷ ভিডিঅ’টোত আছিল নাগেশ্বৰ ৰাওঁ নামৰ এজন বিলাহী কৃষক ৷ তেওঁ ধনৰ অভাৱত হাল বাবলৈ গৰু ভাৰালৈ আনিব নোৱাৰি নিজৰ কন্যা দুগৰাকীকেই হাল টনাত নিয়োজিত কৰিছে ৷ কৰ’ণাৰ সংকটে জুৰুলা কৰাৰ পাচত তেওঁৰ আৰ্থিক অৱস্থা শোচনীয় হৈ পৰাৰ বাবেই কৃষক জনে এনে দৰে কৃষি কৰ্ম কৰিবলগীয়া হৈছিল ৷
তাৰ পিচতেই ভিডিঅ’টো টুইটাৰত চনু চুডে শ্বেয়াৰ কৰি লিখিছিল যে, " এই পৰিয়ালটোৰ প্ৰাপ্য এহাল বলধ নহয়, তেওঁলোকৰ প্ৰাপ্য টেক্টৰ ৷ সেয়ে তোমালোকলৈ এখন পথিয়াম ৷ সন্ধিয়ালৈ তোমালোকৰ পথাৰত টেক্টৰে মাটি চহাব ৷ কুশলে থাকক"
উল্লেখ্য যে, মাৰ্চৰ 24 তাৰিখৰ পৰা দেশত আৰম্ভ হোৱা লক ডাউনত বিভিন্ন স্থানত আবদ্ধ হৈ পৰিছিল দেশৰ জনতা ৷ নিজ ঠাইৰ পৰা কেইবা হাজাৰ কিল’মিটাৰ দূৰলৈ কাম বিচাৰি যোৱা দৰিদ্ৰ শ্ৰমিক সকল দিশহাৰা হৈ পৰে লক ডাউনত ৷ উপায়হীন হৈ বহু শ্ৰমিকেই পদব্ৰজে নিজ ঘৰলৈ বুলি যাত্ৰা আৰম্ভ কৰে ৷ এই সময়চোৱাত বহু শ্ৰমিকৰ মৃত্যু হোৱাৰ লগতে বহু শ্ৰমিক চিকিৎসাধীন হ’ব লগীয়া অৱস্থাও হয় ৷ শ্ৰমিক সকলৰ এই দুখ দেখি তেওঁলোকক সহায়ৰ বাবে হাত আগবঢ়াই বলিউডৰ প্ৰতিষ্ঠিত অভিনেতা চনু চুড ৷ অভিনেতা গৰাকীয়ে তেওঁৰ খৰচত প্ৰায় 18,000 ৰ পৰা 20,000 শ্ৰমিকক বিমানেৰে নিজ ৰাজ্যলৈ পঠিয়াই দিয়াৰ ব্যৱস্থা কৰে ৷
আনহাতে পাঞ্জাৱৰ 1500 ডাক্তৰক তেওঁ PPE কীট দান কৰাৰ লগতে মুম্বাইত থকা তেওঁৰ হোটেলখনত স্থাস্থ্যকৰ্মীক বিনামূলীয়াকৈ থকাৰ ব্যৱস্থা কৰি দিয়ে ৷ ইয়াৰ উপৰিও ৰমজান মাহত তেওঁ বহু দৰিদ্ৰ লোকক খাদ্য প্ৰদান কৰিছিল ৷
লগতে পঢ়কঃকাৰ্গিল : ভাৰতীয় সেনাক পাকিস্তানী অনুপ্ৰৱেশকাৰীৰ খবৰ দিয়া ভেড়াৰখীয়া গৰাকী
