নিউজ ডেস্ক, 23 ডিচেম্বৰ: কেলেংকাৰীৰ আধাৰত নিৰ্ণয় হোৱা ফলাফল কোনো কাৰণতে মানি ল'ব নোৱাৰি ৷ আফগানিস্তানত অলপতে অনুষ্ঠিত হোৱা ৰাষ্ট্ৰপতি নিৰ্বাচনত মিছাৰ আশ্ৰয় লৈ জয়লাভ কৰিছে ৰাষ্ট্ৰপতি আশ্ৰফ গানিয়ে ৷ এই মন্তব্য গানিৰ প্ৰতিদ্বন্দী আব্দুল্লা আব্দুল্লাৰ ৷
নিৰ্বাচনী আয়োগৰ তথ্য অনুসৰি গানিৰ বিৰুদ্ধে নিৰ্বাচনী ফলাফলত কেলেংকাৰীৰ অভিযোগ উত্থাপন হোৱাৰ বাবেই ফলাফল ঘোষণা কৰাত 3 মাহ বিলম্ব হ'ল ৷ নিৰ্বাচনী ফলাফল অনুসৰি গানিয়ে 50.64 শতাংশ ভোট লাভ কৰাৰ বিপৰীতে আব্দুল্লাই লাভ কৰিছিল 39.50 শতাংশ ভোট ৷ আনহাতে মুঠ 1,824,401 ভোটৰ ভিতৰত গানিয়ে 923,868 টা ভোট লাভ কৰাৰ বিপৰীতে আব্দুল্লাই মুঠ 720,099 টা ভোট লাভ কৰাৰ কথা প্ৰকাশ কৰে আন্তৰাষ্ট্ৰীয় নিৰ্বাচনী আয়োগে ৷ এই ফলাফলত সম্পূৰ্ণৰূপে ভুল বুলি দাবী কৰে আব্দুল্লাই ৷