নেশ্যনেল ডেস্ক, 24 ডিচেম্বৰঃ তিনিজন দুৰ্ধৰ্ষ উগ্ৰপন্থীৰ মুক্তিৰ দাবীত IC 814 বিমানৰ অপহৰণৰ 20 টাকৈ বছৰ পাৰ হ'ল ৷ 1999 চনত নেপালৰ পৰা ভাৰতলৈ উৰা মাৰিব লগা এয়াৰ ইণ্ডিয়াৰ এখন বিমানত সংঘটিত হৈছিল এই অপহৰণৰ ঘটনা ৷ বিমানখনত থকা সৰ্বমুঠ 188 পণবন্দীৰ বিনিময়ত তিনিজন উগ্ৰপন্থীক মুকলি কৰি দিয়াৰ দাবী কৰি এই অপহৰণ কৰা হৈছিল ৷ তেতিয়াৰ তালিবান শাসিত কান্ধাৰত অৱশেষত বিমানখনে অৱতৰণ কৰিছিল ৷
মুক্তি প্ৰদান কৰা সেই তিনিজন উগ্ৰপন্থীৰ দুজনেই বৰ্তমানেও পাকিস্তানৰ ভূমিত অবাধে ঘূৰি ফুৰাৰ লগতে তাৰ পৰাই কূটাঘাত চলাই আহিছে ৷ এই দুই দুৰ্ধৰ্ষ উগ্ৰপন্থী হৈছে কাশ্মীৰস্থিত উগ্ৰপন্থী সংগঠন অল ওমৰ মুজাহিদীনৰ নেতা মুস্তাক আহমেদ ওৰফে মুস্তাক লটৰাম আৰু জইছ-ই-মহম্মদৰ প্ৰতিস্থাপক মৌলানা মাছুদ আজহাৰ ৷ মুক্তি লাভ কৰা তৃতীয়জন উগ্ৰপন্থী শ্বেইখ ওমৰক আমেৰিকাৰ সাংবাদিক ডেনিয়েল পাৰ্লক হত্যাৰ অভিযোগত গ্ৰেপ্তাৰ কৰি পাকিস্তানৰ এখন আদালতে মৃত্যুদণ্ডৰ ৰায়দান কৰিছিল ৷
এই অপহৰণৰ পাচতে মুস্তাকে পূৰ্বৰ দৰে মুকলিকৈ উগ্ৰপন্থী কাৰ্যকলাপ নকৰিলেও মাছুদ আজহাৰে ক্ৰমাগতভাৱে ভাৰতৰ বিৰুদ্ধে সন্ত্ৰাসবাদী কাৰ্যকলাপ অব্যাহত ৰাখিছে ৷ কাশ্মীৰ আৰু অন্য বহু স্থানত আত্মঘাতী বোমা আক্ৰমণ আৰম্ভ কৰিছিল আজহাৰেই ৷ ভাৰতীয় সংসদ আৰু জম্মু-কাশ্মীৰ বিধানসভাত আক্ৰমণ সংঘটিত কৰাৰ সমগ্ৰ চক্ৰান্ত ৰচনা কৰিছিল মাছুদ আজহাৰে ৷ আজহাৰে শ্ৰীনগৰৰ আফাক আহমেদ শ্বাহ নামৰ এজন ল'ৰাক আত্মঘাতী বোমাৰুৰূপে প্ৰথমবাৰৰ বাবে ব্যৱহাৰ কৰিছিল ৷ মাছুদে শ্ৰীনগৰস্থিত বাদামীবাঘ সেনা ছাউনীত আক্ৰমণ কৰা অভিসন্ধি ৰচনা কৰিছিল যদিও সেই অভিসন্ধি অসফল হৈছিল ৷
এই বিমান অপহৰণৰ পূৰ্বে আজহাৰক মুকলি কৰিবলৈ কাৰাগাৰ ভঙাৰ অসফল প্ৰচেষ্টাও চলোৱা হৈছিল ৷ আজহাৰৰ ভাতৃ যোচেফে জেল ভঙাৰ লগতে অপহৰণৰ অভিসন্ধি ৰচনা কৰিছিল ৷ মুম্বাইৰ পৰা ঢাকালৈকে অপহৰণৰ সমগ্ৰ পৰিকল্পনা কৰিবলৈ ডেৰ বছৰ সময়ৰ প্ৰয়োজন হৈছিল বুলি তথ্য লাভ কৰা হৈছে ৷ যোচেফৰ এই পৰিকল্পনাত সহযোগী আছিল আব্দুল লতিফ নামৰ এজন ভাৰতীয় ৷ লতিফে পৰিবহণৰ সুবিধা কৰি দিয়াৰ লগতে আজহাৰক আৰ্থিকভাৱেও সহযোগিতা প্ৰদান কৰিছিল ৷ ইয়াৰোপৰি, মুম্বাই আহিবৰ বাবে পাছপ'ৰ্ট আৰু ভাড়া ঘৰৰ সুবিধাও কৰি দিছিল লতিফে ৷
তথ্য অনুসৰি,ভাৰতীয় চোৰাংচোৱা সংস্থা (ৰ)য়ে অপহৰণৰ পূৰ্বেই এক সাৱধানবাণী লাভ কৰিছিল যদিও সংস্থাটোৰ দায়িত্বহীনতাৰ বাবে উগ্ৰপন্থী দলটোৱে বিমানখন অপহৰণ কৰিবলৈ সক্ষম হয় ৷ ভাৰতীয় চোৰাংচোৱা সংস্থা (ৰ) যিজন বিষয়াই এই সাৱধানবাণীক গুৰুত্বসহকাৰে গ্ৰহণ কৰা নাছিল তেওঁকো অপৰহণ হোৱা বিমানখনৰ যাত্ৰীৰূপে উদ্ধাৰ কৰা হৈছিল ৷ ৰৰ বিষয়াগৰাকীৰ পত্নী আছিল সেই সময়ৰ প্ৰধানমন্ত্ৰী অটল বিহাৰী বাজপেয়ীৰ কাৰ্যালয়ৰ প্ৰভাৱশালী অধিকাৰীৰ ঘনিষ্ঠ ৷
ইন্ধনৰ অভাৱ হোৱাৰ বাবে অমৃতসৰৰ বিমানবন্দৰত অপহৰণ হোৱা বিমানখন প্ৰথমে অৱতৰণ কৰিছিল ৷ পণবন্দী ৰ'ৰ বিষয়াগৰাকীক বিমানখনত উদ্ধাৰ নকৰা হ'লে অপহৰণকাৰীৰ বিৰুদ্ধে সৈনিক অভিযান চলোৱা হ'লহেতেন ৷ ৰ'য়ে তেওঁলোকৰ বিষয়াজন সুৰক্ষিত থাকিবৰ বাবে অপহৰণ কৰা বিমানখন মুক্ত কৰি দিছিল আৰু কোনো ধৰণৰ সৈনিক অভিযান চলাবলৈ অনুমতি প্ৰদান কৰা নাছিল ৷ এয়াৰ ট্ৰেফিকৰ অনুমতিৰ অবিহনেই জৰুৰীভাৱে বিমানখন অমৃতসৰৰ পৰা উৰা মৰাৰ ফলত ইন্ধন ভৰাবলৈও সুবিধা লাভ নকৰিলে ৷ কিন্তু ইন্ধনৰ প্ৰয়োজন হোৱাত দ্বিতীয়বাৰৰ বাবে পাকিস্তানৰ লাহোৰত বিমানখন অৱতৰণ কৰা হয় ৷
এই অপহৰণৰ ঘটনাৰ পাচতে বহু তথ্য পোহৰলৈ আহিছিল ৷ ইয়াৰ ভিতৰত প্ৰথমটো আছিল-আফগান তালিবানসকল আই এছ আইৰ সমৰ্থনত আছিল আৰু তালিবানৰ বহু নেতা কাশ্মীৰৰ উগ্ৰপন্থী সংগঠনৰ সৈতে জড়িত আছিল ৷ দ্বিতীয়তে,কাশ্মীৰ আৰু বহু স্থানত উগ্ৰবাদ বিয়পোৱাৰ আঁৰৰ মূল চক্ৰান্তকাৰী হৈছে মাছুদ আজহাৰ ৷ বহু আন্তৰাষ্ট্ৰীয় উগ্ৰপন্থী সংগঠনৰ সৈতে আজহাৰৰ ঘনিষ্ঠ সম্পৰ্ক আছিল ৷ 1999 চনত বিমান অপহৰণৰ জৰিয়তে মুক্তি লাভ কৰা আজহাৰে জইছ-ই-মহম্মদৰ জৰিয়তে সমগ্ৰ ভাৰততে পৰৱৰ্তী পৰ্যায়ত উগ্ৰবাদ বিয়পাইছিল ৷