নিউজ ডেস্ক, ২৮ অক্টোবৰ : ছত্তীশগড় বিধানসভাৰ নিৰ্বাচন সমাগত । নক্সাল প্ৰভাৱিত ৰাজ্যখনত নিৰ্বাচনৰ সময়ত প্ৰৱল সমস্যাৰ সৃষ্টি হয় । ছত্তীশগড়ৰ বস্তাৰ বিভাগ অতি সংবেদনশীল । নক্সালবাদীৰ বাবে বস্তাৰ বিভাগৰ বহু জিলাত ভোটদান কৰাটো প্ৰত্যাহ্বানজনক । বস্তাৰ বিভাগৰ চুকমা, দান্তেৱাড়া, বিজাপুৰ, নাৰায়ণপুৰ, কাঙ্কেৰ আদি জিলাত নক্সালৰ উপস্থিতি অব্যাহত আছে । ইয়াত নক্সালবাদীয়ে সৰু-ডাঙৰ বহু ঘটনা সংঘটিত কৰিছে ।
বস্তাৰ বিভাগত ১ লাখ নিৰাপত্তাৰক্ষী মোতায়েন কৰা হ'ব
বস্তাৰ বিভাগৰ ভিতৰুৱা অঞ্চলত শান্তিপূৰ্ণভাৱে যিকোনো নিৰ্বাচন অনুষ্ঠিত কৰাটো এক ডাঙৰ প্ৰত্যাহ্বান । নিৰ্বাচনৰ সময়ত শান্তি-শৃংখলা বৰ্তাই ৰখাটো সুৰক্ষা বাহিনীৰ তথা নিৰ্বাচনী বিষয়া আৰু কৰ্মচাৰীসকলৰ বাবে প্ৰথম প্ৰত্যাহ্বান । শান্তিপূৰ্ণভাৱে নিৰ্বাচন অনুষ্ঠিত কৰিবলৈ সৈন্যবাহিনী বস্তাৰ বিভাগত সাজু হৈছে । সীমান্ত অঞ্চলত তালাচী অভিযান চলোৱাৰ লগতে নক্সালবিৰোধী অভিযানো তীব্ৰতৰ কৰা হৈছে । ২০২৩ চনৰ বিধানসভা নিৰ্বাচনত এক লাখতকৈও অধিক সেনাৰ নিৰাপত্তা বেষ্টনীত বস্তাৰ বিভাগৰ ১২ খন বিধানসভা আসনত ভোটদান অনুষ্ঠিত হ'ব ।
বস্তাৰ বিভাগত সুৰক্ষা ব্যৱস্থাত নিয়োজিত থাকিব মহিলা ফাইটাৰ্ছো
বস্তাৰ বিভাগত স্থানীয় যুৱক-যুৱতীক লৈ নক্সালী মৰ্চাৰ বাবে বস্তাৰ ফাইটাৰ মোতায়েন কৰা হৈছে । য'ত বহুসংখ্যক মহিলা কমাণ্ডোক অন্তৰ্ভুক্ত কৰা হৈছে । ইয়াৰ উপৰি ডিআৰজি, দন্তেশ্বৰী ফাইটাৰ্ছ, দুৰ্গা ফাইটাৰ্ছ, জিলা বাহিনীত ইতিমধ্যে বৃহৎসংখ্যক মহিলা বাহিনী আছে । মহিলা সুৰক্ষা কৰ্মীসকলেও ভোটকেন্দ্ৰসমূহত নিৰাপত্তা প্ৰদান কৰিব । উল্লেখ্য যে এইবাৰ ছত্তীশগড় বিধানসভা নিৰ্বাচনত সৰ্বাধিক সংখ্যক মহিলা ভোটাৰ আছে । একে সময়তে, বস্তাৰত নিৰ্বাচন সম্পূৰ্ণ কৰিবলৈ ভোটকেন্দ্ৰসমূহত মহিলা কমাণ্ডো মোতায়েন কৰা হ'ব । বস্তাৰৰ আইজি সুন্দৰজ পিয়ে কয় যে বিধানসভা নিৰ্বাচনৰ বাবে ৭ নৱেম্বৰত বস্তাৰ বিভাগত ভোটগ্ৰহণ অনুষ্ঠিত হ'ব । এই প্ৰক্ৰিয়া সুৰক্ষিত আৰু শান্তিপূৰ্ণভাৱে পৰিচালনা কৰাৰ বাবে কঠোৰ নিৰাপত্তা ব্যৱস্থা গ্ৰহণ কৰা হৈছে ।
৩৫ ভোটগ্ৰহণ কেন্দ্ৰৰ সুৰক্ষা মহিলা কমাণ্ডোৰ হাতত
৭ নৱেম্বৰত ছত্তীশগড়ৰ প্ৰথম পৰ্যায়ৰ বিধানসভা নিৰ্বাচনৰ সময়ত নক্সাল প্ৰভাৱিত বস্তাৰ বিভাগৰ ৩৫ টা ভোটকেন্দ্ৰ বস্তাৰ ফাইটাৰ্ছৰ মহিলা কমাণ্ডোসকলে সম্পূৰ্ণৰূপে সুৰক্ষিত ৰাখিব । এটা বুথ তৃতীয় লিংগৰ আৰক্ষীৰ তত্ত্বাৱধানত থাকিব । বস্তাৰ বিভাগৰ সাতখন জিলাৰ ভিতৰত ছয়টাত মহিলা ভোটাৰৰ সংখ্যা পুৰুষতকৈ অধিক । ৯.৯ লাখ পুৰুষৰ বিপৰীতে জিলাখনত ১০.৪ লাখ মহিলা ভোটাৰ আছে ।
"বস্তাৰ আৰক্ষীৰ ওচৰত ইতিমধ্যে ডিআৰজি, এছটিএফ, কোব্ৰা, জিলা বাহিনী আৰু কেন্দ্ৰীয় অৰ্ধসামৰিক বাহিনী চিআৰপিএফ, বিএছএফ, আইটিবিপিৰ জোৱান আছে । ইয়াৰ উপৰি বাহিৰৰ পৰা নিৰ্বাচন আয়োগৰ জৰিয়তে অতিৰিক্ত বাহিনীও লাভ কৰা হৈছে । এই সকলো সুৰক্ষা বাহিনীৰ জোৱানক প্ৰয়োজনীয় অঞ্চলত মোতায়েন কৰা হৈছে । যিবোৰ অঞ্চলত নক্সালবিৰোধী অভিযান চলোৱা হৈছে, তাত নিৰাপত্তা বাহিনীৰ সংখ্যা বৃদ্ধি কৰি অভিযান তীব্ৰতৰ কৰা হৈছে ।" বস্তাৰৰ আইজিয়ে কয় ।
লগতে পঢ়ক :Indian Mobile Congress : ডিজিটেল ষ্টেচু অৱ ইউনিটি নিৰ্মাণৰ প্ৰতিশ্ৰুতি আকাশ আম্বানীৰ
