যিকোনো প্ৰকাৰে কৰ'ণাত মৃত্যুৰ সংখ্য়া হ্ৰাস কৰিব লাগিব: প্ৰধানমন্ত্ৰী

প্ৰধানমন্ত্ৰী নৰেন্দ্ৰ মোডীয়ে দেওবাৰে শীৰ্ষ বিষয়াসকলক চিকিৎসালয়ত ভৰ্তি হোৱা, চিকিৎসালয়ত পৰ্যাপ্ত বিচনা, জীৱন বচাবলৈ অক্সিজেন আৰু ভেন্টিলেটৰৰ যোগান নিশ্চিত কৰি যিকোনো প্ৰকাৰে ক'ভিড সম্পৰ্কীয় মৃত্যু হাৰ হ্ৰাস কৰিবলৈ আহ্বান জনায় । ক'ভিড প্ৰটকলৰ ক্ষেত্ৰতো কঠোৰ ব্যৱস্থা গ্ৰহণৰ নিৰ্দেশ দিয়ে প্ৰধানমন্ত্ৰীগৰাকীয়ে ।

নেশ্যনেল ডেস্ক, ৪ এপ্ৰিল:কেন্দ্ৰীয় চৰকাৰ আৰু নীতি আয়োগৰ শীৰ্ষ বিষয়াসকলৰ সৈতে এক উচ্চ পৰ্যায়ৰ বৈঠকত প্ৰধানমন্ত্ৰী মোডীয়ে তেওঁলোকক দেশত কৰ'ণা ভাইৰাছ সংক্ৰমণৰ দ্বিতীয় প্ৰৱাহ ৰোধ কৰিবলৈ ৰাজহুৱা সমাৱেশ পদ্ধতিৰ পৰীক্ষা, অনুসৰণ, চিকিৎসা, ক'ভিডৰ-উপযুক্ত আচৰণ আৰু টীকাকৰণৰ পাঁচ দফীয়া কৌশল অনুসৰণ কৰিবলৈ আহ্বান জনায় ।

ক'ভিডৰ প্ৰকৃত লক্ষণ আৰু চেনিটাইজেশ্যন সন্দৰ্ভত ৰাইজক সজাগ কৰাৰ বাবে ৬ এপ্ৰিলৰ পৰা ১৪ এপ্ৰিললৈ সপ্তাহজোৰা এক সজাগতামূলক কাৰ্যসূচী ৰূপায়ণৰো আহ্বান জনায় প্ৰধানমন্ত্ৰী গৰাকীয়ে ।

১ মাৰ্চত ভাৰতত ১১,৫৬৩ টা কৰণাৰ নতুন ঘটনা পোহৰলৈ আহিছিল আৰু ফেব্ৰুৱাৰী মাহত গড় হিচাপত দৈনিক ঘটনা আছিল ১০ হাজাৰৰ পৰা ১১ হাজাৰৰ ভিতৰত । কিন্তু এই মাহৰ আৰম্ভণিতে শনিবাৰৰ দিনটোত ৯৩ হাজাৰ লোক আক্ৰান্ত হোৱাৰ বিপৰীতে ২ এপ্ৰিলত মৃত্যু হোৱা লোকৰ সংখ্যা আছিল ৭১৩ গৰাকী ।

ইফালে ভাৰতৰ কেইখনমান ৰাজ্য নতুনকৈ যথেষ্ট পৰিমাণে প্ৰভাৱান্বিত হোৱা দেখা গৈছে । যাৰ বাবে প্ৰধানমন্ত্ৰীগৰাকীয়ে ঘোষণা কৰিছে যে অতি শীঘ্ৰে জনস্বাস্থ্য বিশেষজ্ঞ আৰু চিকিৎসকৰ কেন্দ্ৰীয় দল বিশেষকৈ মহাৰাষ্ট্ৰ, ছত্তিশগড় আৰু পাঞ্জাৱলৈ পঠিওৱা হ'ব । শেহতীয়া সংক্ৰমণৰ প্ৰতি লক্ষ্য ৰাখি ৰাজ্যসমূহক কঠোৰ ব্যৱস্থা গ্ৰহণ কৰাৰ লগতে কনটেইনমেন্ট অঞ্চলসমূহো সঠিকভাৱে নিৰূপণ কৰিবলৈ প্ৰধানমন্ত্ৰীয়ে আহ্বান জনাইছে ।

উচ্চ পৰ্যায়ৰ বৈঠকত পোহৰলৈ আহিছে যে কৰ’ণাৰ ফলত ১০ খন ৰাজ্যত ৯১ শতাংশতকৈ অধিক ঘটনা আৰু মৃত্যুৰ হাৰ বৃদ্ধি হৈছে । যোৱা ১৪ দিনত দেশত মৃত্যুৰ হাৰ ৪৭ শতাংশ হোৱাৰ বিপৰীতে মহাৰাষ্ট্ৰত আক্ৰান্তৰ হাৰ ৫৭ শতাংশ পোৱা গৈছে । একেদৰে পাঞ্জাৱ আৰু ছত্তিশগড়তো যথেষ্ট পৰিমাণে বৃদ্ধি হৈছে দৈনিক আক্ৰান্তৰ সংখ্যা । বৈঠকত কোৱা হৈছে যে সঠিকভাৱে ক'ভিড প্ৰট'কল পালন নকৰাৰ বাবেই এইধৰণে আক্ৰান্তৰ সংখ্যা বৃদ্ধি হৈছে ।

বৈঠকত প্ৰধানমন্ত্ৰীয়ে বৰ্তমানৰ প্ৰতিষেধক নিৰ্মাতা সকলৰ উৎপাদন ক্ষমতা আৰু পৰীক্ষণৰ অধীনত থকা প্ৰতিষেধকৰ ক্ষমতাৰ উপৰিও প্ৰতিষেধকৰ গৱেষণা আৰু বিকাশৰ বিষয়টোও আলোচনা কৰে । বিষয়াসকলে জনোৱা মতে প্ৰতিষেধকৰ উৎপাদন ক্ষমতা বৃদ্ধি কৰিছে নিৰ্মাতাসকলে । বিষয়াসকলে জনোৱা মতে ঘৰুৱা প্ৰয়োজনীয়তা পূৰণ কৰাৰ লগতে আন দেশসমূহৰ প্ৰয়োজনীয়তাৰ প্ৰতিও গুৰুত্ব দিয়া হৈছে । শেহতীয়াকৈ আক্ৰান্তৰ সংখ্যা বৃদ্ধি পোৱা ৰাজ্য আৰু জিলাসমূহত বিশেষ অভিযানৰ বাবে আহ্বান জনাই প্ৰধানমন্ত্ৰী নৰেন্দ্ৰ মোডীয়ে ।

বৈঠকত প্ৰধানমন্ত্ৰী মোডীৰ প্ৰধান সচিব, কেবিনেট সচিব, গৃহ সচিব, অধ্যক্ষ, স্বাস্থ্য সচিব, ফাৰ্মাচিউটিকেলৰ সচিব, জৈৱ প্ৰযুক্তি সচিব, নীতি আয়োগৰ সদস্য আৰু অন্যান্য জ্যেষ্ঠ বিষয়াসকলে অংশগ্ৰহণ কৰে ।

লগতে পঢ়ক:৪ এপ্ৰিল: আন্তৰ্জাতিক খনি সজাগতা দিৱস