নেশ্যনেল ডেস্ক, 16 জানুৱাৰী : বিমান পৰিচালন নিৰীক্ষণকাৰী সংস্থা ডিজিচিএ-য়ে সোমবাৰে এয়াৰলাইনসমূহক বিমান বিলম্ব হোৱা সম্পৰ্কে সঠিক সময়ৰ তথ্য প্ৰকাশ কৰিবলৈ বিমান বন্দৰসমূহলৈ নিৰ্দেশনা জাৰি কৰিছে ৷ ইয়াৰ লগতে বিমান বন্দৰত কুঁৱলী সম্পৰ্কীয় ব্যাঘাতৰ সন্দৰ্ভত যাত্ৰীসকলৰ সৈতে সঠিককৈ যোগাযোগ কৰিবলৈ বিমানবন্দৰত কৰ্মচাৰীসকলক নিৰ্দেশনা দিয়ে । শেহতীয়াকৈ ঘন কুঁৱলীৰ বাবে যথেষ্ট সংখ্যক বিমান বিলম্বিত আৰু বাতিল হোৱাৰ লগতে যাত্ৰীসকলে অস্বাভাৱিক পৰিস্থিতিৰ সন্মুখীন হোৱাৰ সন্দৰ্ভত এক SOP জাৰি কৰিছে ৷
অসামৰিক বিমান পৰিবহন সঞ্চালকালয়ে (ডিজিচিএ) এক বিবৃতিত জনোৱা অনুসৰি, এয়াৰলাইনসমূহে তেওঁলোকৰ বিমানত পলম হোৱা সম্পৰ্কে যাত্ৰীসকলক সঠিক তথা বাস্তৱ সময়ৰ তথ্য প্ৰকাশ কৰিব লাগে । বিমান বন্দৰত কৰ্মচাৰীসকলে সতৰ্ক তথা সজাগ হৈ থাকিব লাগে যাতে বিমানৰ বিলম্বৰ বিষয়ে যাত্ৰীসকলক উপযুক্তভাৱে যোগাযোগ কৰাৰ লগতে সঠিক সময় অৱগত কৰা হয় ৷
" দেশৰ কেইবাটাও প্ৰান্তত কুঁৱলীৰ লগতে প্ৰতিকূল বতৰৰ পৰিস্থিতিৰ প্ৰতি লক্ষ্য ৰাখি, বিমান সেৱাসমূহে বিমানবন্দৰত ভিৰ হ্ৰাস কৰা আৰু যাত্ৰীৰ অসুবিধা হ্ৰাস কৰাৰ লক্ষ্যৰে 3 ঘণ্টাতকৈও অধিক সময়ৰ পিচত বিমান বিলম্ব কৰাৰ সম্ভাৱনা থাকে, অথবা বিমান বাতিল কৰিব পাৰে ৷" ডিজিচিএ-য়ে উল্লেখ কৰে ৷