গুৱাহাটী, ৫ মে' : অসম চৰকাৰে টাটা ট্ৰাষ্টৰ সহযোগত কৰ্কট ৰোগীসকলৰ বাবে অত্যাধুনিক আৰু সুলভ চিকিৎসা সেৱা উপলব্ধ কৰিবলৈ অসমত আৰম্ভ কৰা দক্ষিণ-পূৱ এছিয়াৰ সৰ্ববৃহৎ কৰ্কট চিকিৎসা নেটৱৰ্কে ৰাষ্ট্ৰীয় স্তৰতো প্ৰশংসা বুটলিবলৈ সক্ষম হৈছে ।ভাৰত চৰকাৰৰ স্বাস্থ্য আৰু পৰিয়াল কল্যাণ মন্ত্ৰাণালয়ে (Ministry of Health and Family Welfare) অনুষ্ঠিত কৰা 'স্বাস্থ্য চিন্তন শিবিৰ'ত এই ক্ষেত্রত অসমে প্ৰশংসা লাভ কৰিছে (Appreciates the steps taken by Assam in Gujarat)।
গুজৰাটৰ নৰ্মদা নদীৰ পাৰৰ লৌহপুৰুষ চৰ্দাৰ বল্লভ ভাই পেটেলৰ প্ৰতিমূৰ্তি ষ্টেচ্যু অৱ ইউনিটী'ৰ (Statue of Unity of Gujarat) সমীপৰ কেৱড়িয়াৰ একতা নগৰত অনুষ্ঠিত হৈছে এই শিবিৰ ৷ 'স্বাস্থ্য চিন্তন শিবিৰ' শীৰ্ষক চতুৰ্দশ সন্মিলনৰ প্ৰথমদিনা অসমৰ স্বাস্থ্যমন্ত্ৰী কেশৱ মহন্তই আছাম কেন্সাৰ কেয়াৰ ফাউণ্ডেচনৰ (Assam Cancer Care Foundation)অধীনত নিৰ্মাণ কৰা কৰ্কট চিকিৎসা কেন্দ্ৰসমূহৰ জৰিয়তে অসমত কৰ্কট ৰোগ প্ৰতিৰোধৰ বাবে লোৱা দূৰদৰ্শী পদক্ষেপৰ বিষয়ে বিস্তাৰিতভাৱে উপস্থাপন কৰে ।
কেন্দ্ৰীয় স্বাস্থ্য আৰু পৰিয়াল কল্যাণ, ৰসায়ন আৰু সাৰ দপ্তৰৰ মন্ত্ৰী ড৹ মনসুখ মান্দাভিয়া আৰু ৰাজ্যমন্ত্ৰী ডাঃ ভাৰতী প্ৰবীণ পাৱাৰৰ লগতে ২৫ খন ৰাজ্যৰ স্বাস্থ্যমন্ত্ৰী আৰু শীৰ্ষ বিষয়াসকলৰ উপস্থিতিত বৃহস্পতিবাৰে আয়োজিত স্বাস্থ্য চিন্তন শিবিৰৰ প্ৰথম আলোচনাত ৰাজ্যসমূহে স্বাস্থ্য আৰু চিকিৎসা সেৱা খণ্ডত প্ৰদৰ্শন কৰা শ্ৰেষ্ঠ অনুশীলন শিতানত স্বাস্থ্যমন্ত্ৰী মহন্তই অসমৰ কৰ্কট চিকিৎসালয়সমূহৰ বিষয়টো উপস্থাপন কৰে ।
ইফালে তেওঁ টাটা ট্ৰাষ্টৰ সহযোগত অসম চৰকাৰে ৰাজ্যখনক দক্ষিণ-পূৱ এছিয়াৰ কৰ্কট ৰোগ চিকিৎসাৰ প্ৰাণকেন্দ্ৰৰূপে গঢ়ি তুলিবলৈ লোৱাৰ বিষয়ে সন্মিলনত প্ৰকাশ কৰে। ইয়াৰ পাছতে সন্মিলনত এই বিষয়ে হোৱা আলোচনাত কেন্দ্ৰীয় স্বাস্থ্যমন্ত্ৰীসহ ৰাজ্যসমূহৰ স্বাস্থ্যমন্ত্ৰীসকলেও কৰ্কট ৰোগীক সকাহ দিবলৈ অসমত লোৱা এই পদক্ষেপৰ ভূয়সী প্ৰশংসা কৰে ।