নেশ্যনেল ডেস্ক,২৫ নৱেম্বৰ : উত্তৰকাশীৰ সুৰংগত উদ্ধাৰ অভিযান অব্যাহত আছে । বিগত ১৪ দিন ধৰি প্ৰশাসনৰ লগতে বিভিন্ন বিশেষজ্ঞ দলে অভিযান অব্যাহত ৰাখিছে । অভিযানৰ সময়ত বিভিন্ন ধৰণৰ প্ৰত্যাহ্বানৰ সন্মুখীন হৈছে উদ্ধাৰকাৰী দল । ড্ৰিলিং চলাই থকা অগাৰ যন্ত্ৰটো এইবাৰ ক্ষতিগ্ৰস্ত হৈছে । প্ৰায় ৪ বাৰকৈ সুৰংগৰ আৱৰ্জনা আঁতৰোৱাৰ সময়ত লোৰ ৰড আৰু পাইপত অগাৰ ড্ৰিলিং মেচিনে খুন্দা মাৰিছে । ফলত যন্ত্ৰটো যথেষ্ট ক্ষতিগ্ৰস্ত হৈছে ।
চিল্কয়াৰা সুৰংগৰ উদ্ধাৰ অভিযানত ব্যস্ত অষ্ট্ৰেলিয়াৰ আন্তঃৰাষ্ট্ৰীয় সুৰংগ বিশেষজ্ঞ আৰ্নল্ড ডিক্সে কয় যে অগাৰ ড্ৰিলিং যন্ত্ৰটোৱে আৰু কাম কৰিব নোৱাৰে । অৱশ্যে তেওঁ নিশ্চিত কৰিছে উদ্ধাৰ অভিযানৰ বাবে দলটোৰ হাতত এতিয়াও বহু উপায় আছে । কিন্তু এতিয়াৰে উদ্ধাৰ অভিযানত অগাৰ যন্ত্ৰটোৱে কাম কৰিব নোৱাৰে । তেওঁৰ মতে অগাৰ মেচিনৰ সন্মুখৰ অংশ ভাঙি গৈছে ।