মহিলাই পৰিচালনা কৰিব ছান ফ্ৰাঞ্চিছকো-বেঙ্গালুৰুৰ প্ৰথমখন বিমান

শনিবাৰে প্ৰথমখন বিমান আমেৰিকাৰ ছান ফ্ৰাঞ্চিছকোৰ পৰা উৰা মাৰিব ভাৰতলৈ । তাৰ প্ৰাকক্ষণত ভাৰতৰ অসামৰিক বিমান পৰিবহন মন্ত্ৰী হৰদ্বীপ সিং পুৰীৰ টুইটযোগে ঘোষণা- "ঐতিহাসিক বিমান সেৱাৰ প্ৰথমখন বিমান কেৱল মহিলা ককপীট চালকে পৰিচালনা কৰিব ।"

নিউজ ডেস্ক , ৯ জানুৱাৰী : বহু প্ৰত্য়াশিত ছান ফ্ৰাঞ্চিছকো আৰু বেঙ্গালুৰুৰ মাজত আৰম্ভ হ'ব বিমান সেৱা । বিমান যাত্ৰাৰ ক্ষেত্ৰত বিশ্বৰ সৰ্বাধিক দূৰত্বৰ ভিতৰত অন্য়তম হ'ব বেঙ্গালুৰু আৰু ছান ফ্ৰাঞ্চিছকোৰ মাজৰ দূৰত্ব । শনিবাৰে প্ৰথমখন বিমান আমেৰিকাৰ ছান ফ্ৰাঞ্চিছকোৰ পৰা উৰা মাৰিব ভাৰতলৈ । তাৰ প্ৰাকক্ষণত ভাৰতৰ অসামৰিক বিমান পৰিবহন মন্ত্ৰী হৰদ্বীপ সিং পুৰীৰ টুইটযোগে বিশেষ ঘোষণা । ঘোষণা অনুসৰি দুয়োখন দেশৰ মাজত আৰম্ভ হোৱা এই ঐতিহাসিক বিমান সেৱাৰ প্ৰথমখন বিমান কেৱল মহিলা ককপীট চালকে পৰিচালনা কৰিব । এয়াৰ ইণ্ডিয়াৰ বিশেষ বিমানখন পৰিচালনা কৰা মহিলাসকলৰ ভিতৰত থাকিব কেপ্তেইন জয়া আগৰৱাল, কেপ্তেইন পাপাগৰি থানমাই, কেপ্তেইন আকাংক্ষা সোনাৱাৰে আৰু কেপ্তেইন শিবানী মানহাছ । মহিলা সকলক উদ্দেশ্য়ি মন্ত্ৰীগৰাকীয়ে কয় যে এয়াৰ ইণ্ডিয়াৰ মহিলা শক্তিয়ে ইতিমধ্য়ে বিশ্বজুৰি বিমান পৰিচালনা কৰিছে ।

ইয়াৰ মাজতে বিমান কতৃপক্ষৰ এগৰাকী শীৰ্ষ বিষয়াই জনোৱা মতে উত্তৰ মেৰুৰ পৰা যাত্ৰা আৰম্ভ কৰিব লগা এই বিমানখন আটলান্টিক মহাসাগৰৰ ওপৰেৰে আহি বেঙ্গালুৰুত অৱতৰণ কৰিব । AI176 বিমানখন আমেৰিকাৰ ছান ফ্ৰাঞ্চিছকোৰ পৰা শনিবাৰে স্থানীয় সময় অনুসৰি নিশা ৮.৩০ বজাত যাত্ৰা আৰম্ভ কৰিব আৰু সোমবাৰে পুৱা ৩.৪৫ বজাত কেম্পেগৌড়া আন্ত:ৰাষ্ট্ৰীয় বিমান বন্দৰত অৱতৰণ কৰিব ।

লগতে পঢ়ক :এইচ-১ ভিছাৰ নিষেধাজ্ঞাক লৈ আমেৰিকাৰ সৈতে আলোচনা ভাৰতৰ