নেশ্যনেল ডেস্ক,২৬ ফেব্ৰুৱাৰী :ৰাছিয়া আৰু ইউক্ৰেইনৰ যুদ্ধ অব্যাহত আছে (Russia-Ukraine war)। ইউক্ৰেইনৰ বিভিন্ন স্থানত ৰাছিয়াৰ সেনা বাহিনীয়ে ইতিমধ্যে আক্ৰমণ কৰাৰ লগতে তেওঁলোকৰ দখললৈ আনিবলৈ সক্ষম হৈছে । ইফালে ৰাছিয়াৰ এনে আক্ৰমণক লৈ সমগ্ৰ বিশ্ববাসী উদ্বিগ্ন হোৱা দেখা গৈছে । ইউকে (UK), আমেৰিকা যুক্তৰাষ্ট্ৰ (USA), কানাডা আৰু ইউৰোপীয় ইউনিয়নকে ধৰি কেইবাখনো দেশে ৰাছিয়াৰ সামৰিক অভিযানক গৰিহণা দিছে আৰু মস্কোৰ ওপৰত নিষেধাজ্ঞা আৰোপ কৰিছে ।
ইউক্ৰেইনৰ সংকটৰ মাজতে তাত আবদ্ধ হৈ থকা ভাৰতীয় নাগৰিকসকলক সুৰক্ষিতভাৱে দেশলৈ ঘূৰাই অনাৰ বাবেও প্ৰচেষ্টা অব্যাহত ৰখা হৈছে । ইতিমধ্যে এয়াৰ ইণ্ডিয়াকে ধৰি কেইবাটাও বিমান সেৱা সংস্থাই বিশেষ বিমান পৰিচালনা কৰি আছে । ইয়াৰ মাজতে এয়াৰ ইণ্ডিয়াই ঘোষণা কৰা মতে এয়াৰ লিফ্টৰ (Airlift) বাবে শনিবাৰে পুনৰ দুখন বিমান প্ৰেৰণ কৰিব (Air India operations to rescue Indians stranded in Ukraine)।