নিউজ ডেস্ক, ১৮ ছেপ্টেম্বৰ :ভাৰতৰ সৌৰ অভিযান আদিত্য এল ১ৰ এক গুৰুত্বপূৰ্ণ সফতা । ইছৰোৱে সোমবাৰে ঘোষণা কৰে যে আদিত্যই সৌৰ বায়ুকণা এক্সপেৰিমেণ্ট (ASPEX) পেলোডৰ এটা অংশ ছুপাৰ থাৰ্মেল এণ্ড এনাৰ্জেটিক পাৰ্টিকল স্পেক্ট্ৰোমিটাৰ (Supra Thermal & Energetic Particle Spectrometer, STEPS) সঁজুলিটোৱে বৈজ্ঞানিক তথ্য সংগ্ৰহ আৰম্ভ কৰিছে ।
ভাৰতীয় গৱেষণা মহাকাশ সংস্থাই (ইছৰো) পিএছএলভি-চি৫৭ৰ দ্বাৰা ভাৰতৰ প্ৰথম সৌৰ মহাকাশ পৰ্যবেক্ষণালয় আদিত্য-এল১ৰ শেহতীয়া আপডেট ঘোষণা কৰিছে এক্স হেণ্ডেলত । "আদিত্য-এল১-এ বৈজ্ঞানিক তথ্য সংগ্ৰহ কৰা আৰম্ভ কৰিছে । ষ্টেপছ সঁজুলিৰ ছেন্সৰে পৃথিৱীৰ পৰা ৫০,০০০ কিলোমিটাৰতকৈও অধিক দূৰত্বত ছুপাৰ থাৰ্মেল এণ্ড এনাৰ্জেটিক আয়ন আৰু ইলেক্ট্ৰন জোখা আৰম্ভ কৰিছে । এই তথ্যই বিজ্ঞানীসকলক পৃথিৱীৰ চাৰিওফালে থকা কণাবোৰৰ আচৰণ বিশ্লেষণ কৰাত সহায় কৰিব ।" ইছৰোৱে কয় ।
লক্ষণীয়ভাৱে ষ্টেপছ সঁজুলিত ছয়টা ছেন্সৰ আছে । প্ৰতিটোৱে বিভিন্ন দিশত পৰ্যবেক্ষণ কৰে আৰু ১ এমইভি অতিক্ৰম কৰা ইলেক্ট্ৰনৰ উপৰি ২০ কেভি/নিউক্লিয়নৰ পৰা ৫ এমইভি/নিউক্লিয়নলৈকে ছুপাৰ-থাৰ্মেল আৰু এনাৰ্জেটিক আয়ন জোখা হয় । এই জোখবোৰ নিম্ন আৰু উচ্চ শক্তিৰ পাৰ্টিকল স্পেক্ট্ৰোমিটাৰ ব্যৱহাৰ কৰি পৰিচালনা কৰা হয় । পৃথিৱীৰ কক্ষপথৰ সময়ত সংগ্ৰহ কৰা তথ্যই বিজ্ঞানীসকলক পৃথিৱীৰ চাৰিওফালে থকা কণাবোৰৰ আচৰণ বিশ্লেষণ কৰাত সহায় কৰে, বিশেষকৈ পৃথিৱীৰ চুম্বকীয় ক্ষেত্ৰৰ উপস্থিতিত ।