নেশ্যনেল ডেস্ক, 30 আগষ্ট: বিৰোধী মিত্ৰজোঁট I.N.D.I.Aৰ তৃতীয়খন বৈঠক 31 আগষ্ট আৰু 1 ছেপ্টেম্বৰত মুম্বাইত অনুষ্ঠিত হ’ব ৷ ইয়াৰ পূৰ্বে বুধবাৰে আম আদমী পাৰ্টীৰ মুখ্য মুখপাত্ৰই অৰবিন্দ কেজৰিৱালক প্ৰধানমন্ত্ৰী পদৰ প্ৰাৰ্থী হিচাবে ঘোষণা কৰিবলৈ দাবী জনায় ৷ এই মন্তব্যৰ প্ৰতি দিল্লী চৰকাৰৰ মন্ত্ৰী গোপাল ৰায়েও সমৰ্থন আগবঢ়ায় ৷ এই দাবীয়ে কিছু সময়ৰ বাবে ৰাজনৈতিক উষ্ণতা বৃদ্ধি কৰিছিল যদিও আপে পৰৱৰ্তী পৰ্যায়ত এই সিদ্ধান্ত প্ৰত্যাহাৰ কৰে ৷
দলৰ জ্যেষ্ঠ নেত্ৰী তথা মন্ত্ৰী আতিশী, সাংসদ সঞ্জয় সিং আৰু ৰাঘৱ চাদ্দাই ইয়াক সম্পূৰ্ণৰূপে প্ৰত্যাখ্যান কৰে আৰু কয় যে আমি প্ৰধানমন্ত্ৰীৰ হ’বলৈ নহয়, দেশৰ ভৱিষ্যত গঢ়ি তুলিবলৈ একত্ৰিত হৈছো ৷
কি কৈছিল আপৰ নেতৃত্বই:
বুধবাৰে আপৰ মুখ্য মুখপাত্ৰ প্ৰিয়ংকা কক্কৰে কয় যে মুখ্যমন্ত্ৰী অৰবিন্দ কেজৰিৱালক প্ৰধানমন্ত্ৰী পদৰ প্ৰাৰ্থী কৰা উচিত । তেওঁ দিল্লীত মুখ্যমন্ত্ৰী কেজৰিৱালৰ দ্বাৰা প্ৰদান কৰা সুবিধাসমূহৰ উদাহৰণ দিয়ে । বুধবাৰে দুপৰীয়া 12 বজাত দিল্লী সচিবালয়ত এক সংবাদমেলত দিল্লী চৰকাৰৰ পৰিৱেশ মন্ত্ৰী গোপাল ৰায়ে কয় যে প্ৰতিটো দলে নিজৰ মুৰব্বী প্ৰধানমন্ত্ৰী হোৱাটো বিচাৰে । একেদৰে, আমিও বিচাৰো যে অৰবিন্দ কেজৰিৱালক প্ৰধানমন্ত্ৰী পদৰ প্ৰাৰ্থী হওক, কিন্তু এই সিদ্ধান্ত I.N.D.I.Aই গ্ৰহণ কৰিব ৷
দাবী প্ৰত্যাহাৰ:
দলটোৰ মুখপাত্ৰ কক্কৰৰ বক্তব্যৰ প্ৰায় তিনি ঘণ্টা পিচত মন্ত্ৰী আতিশীয়ে দিল্লী সচিবালয়ত কয় যে দেশ আৰু গণতন্ত্ৰ ৰক্ষাৰ বাবে আম আদমী পাৰ্টীয়ে I.N.D.I.Aত যোগদান কৰিছে । মই আনুষ্ঠানিকভাৱে কওঁ যে মুখ্যমন্ত্ৰী কেজৰিৱাল মিত্ৰজোঁটৰ প্ৰধানমন্ত্ৰী পদৰ প্ৰাৰ্থী নহয় ৷ তেওঁ লগতে কয় যে এয়া প্ৰিয়ংকা কক্কৰৰ ব্যক্তিগত মতামত হ’ব পাৰে যে মুখ্যমন্ত্ৰী কেজৰিৱালক মিত্ৰজোঁটৰ পৰা প্ৰধানমন্ত্ৰী পদৰ প্ৰাৰ্থী হিচাবে প্ৰক্ষেপ কৰা উচিত ৷