নেশ্যনেল ডেস্ক,8 এপ্ৰিল: উত্তৰাখণ্ডৰ হৰিদ্বাৰস্থিত আইআইটি ৰুড়কীৰ প্ৰায় 88 গৰাকী শিক্ষাৰ্থী কৰ’ণা ভাইৰাছত আক্ৰান্ত হৈছে ৷ প্ৰতিষ্ঠানটোৰ এগৰাকী প্ৰশাসনিক বিষয়াই বৃহস্পতিবাৰে সদৰী কৰিলে এই তথ্য ৷ প্ৰতিষ্ঠানটোৰ মুখপাত্ৰ ছোনিকা শ্ৰীবাস্তৱে কয় যে, চৌহদৰ ভিতৰত থকা গংগা হোষ্টেলখনক অস্থায়ীভাৱে ক’ভিড কেয়াৰ চেণ্টাৰলৈ ৰূপান্তৰিত কৰি আটাই কেইগৰাকী শিক্ষাৰ্থীক সেই স্থানত ৰখাৰ ব্যৱস্থা কৰা হৈছে ৷
এই শিক্ষাৰ্থীসকলক হৰিদ্বাৰৰ এদল চিকিৎসকৰ পৰ্যবেক্ষণত ৰখা হৈছে বুলি কয় শ্ৰীবাস্তৱে ৷ তেখেতে জানিব দিয়ে যে, প্ৰতিষ্ঠানটোৰ প্ৰায় পাঁচটা হোষ্টেল বন্ধ ৰখা হৈছে ৷ কিন্তু অনলাইন পাঠদানত কোনো ব্যাঘাত হোৱা নাই ৷ প্ৰতিষ্ঠানটোৱে ৰাজ্য চৰকাৰৰ সকলো ক’ভিড-19 ৰ নিৰ্দেশনা কঠোৰভাৱে পালন কৰি আছে ৷