সন্ধিয়া 7 বজাৰ দহটা শীৰ্ষ বাতৰি

সন্ধিয়া 7 বজাৰ দহটা শীৰ্ষ বাতৰি...

কাইলৈ অৰ্থাৎ 25 ডিচেম্বৰত ভাৰতৰত্ন প্ৰয়াত অটল বিহাৰী বাজপেয়ীৰ জন্মতিথি । অটল বিহাৰী বাজপেয়ীৰ জন্মতিথি উপলক্ষে বৃহস্পতিবাৰৰ পৰা মৰাণত দুদিনীয়াকৈ আৰম্ভ হৈছে আমন্ত্ৰণমূলক প্ৰাইজমণি ফুটবল প্ৰতিযোগিতা ।

মিজোৰামৰ আইজলস্থিত অসম ৰাইফলছৰ 46 বেটালিয়নে বৰদিন উপলক্ষে অনাথ আশ্ৰমত উপস্থিত হয় ৷ আশ্ৰমত উপস্থিত হৈ শিশুসকলৰ সৈতে বিভিন্ন কাৰ্যসূচী উদযাপন কৰাৰ লগতে খাদ্য সামগ্ৰী বিতৰণ কৰে ৷

মহাৰাষ্ট্ৰৰ পালঘৰত আৰক্ষীৰ সন্মুখতেই হত্যা কৰা হৈছিল দুগৰাকী সাধু আৰু তেওঁলোকৰ গাড়ীচালকক ৷ এই ঘটনাৰ সৈতে জড়িত থকা আৰু 19 গৰাকী লোকক আৰক্ষীয়ে গ্ৰেপ্তাৰ কৰিছে ৷

প্ৰতিবছৰে 24 ডিচেম্বৰত ৰাষ্ট্ৰীয় উপভোক্তা দিৱস পালন কৰা হয় ৷ উপভোক্তা আইনে গ্ৰাহকৰ হিতৰ বাবে উল্লেখনীয় সুৰক্ষা প্ৰদান কৰে ৷ যদি কোনো উৎপাদিত সামগ্ৰীয়ে আপোনাৰ লোকচান কৰিছে অথবা তাৰ চৰ্তত উপনীত হোৱা নাই, তেতিয়া তাৰ বিৰুদ্ধে আপুনি অভিযোগ দাখিল কৰিব পাৰে, উচিত ক্ষতিপূৰণ দাবী কৰিব পাৰে ৷ ইয়াৰ বাবে পৃথকে গ্ৰাহক সুৰক্ষা আদালত স্থাপন কৰা হৈছে ৷

তত্বাৱধায়কৰ দায়িত্ব লোৱাৰ পাছত অসমলৈ প্ৰথমবাৰলৈ আহি জিতেন্দ্ৰ সিঙে যি তিতা অভিজ্ঞতাৰ সন্মুখীন হ'ল, সিয়ে এতিয়া প্ৰদেশ কংগ্ৰেছৰ সভাপতি ৰিপুন বৰাৰ বাবে বিপদ মাতি অনাৰ অতিক্ৰম হৈছে । প্ৰদেশ কংগ্ৰেছৰে এক শীৰ্ষ সুত্ৰই প্ৰকাশ কৰা মতে, ইতিমধ্যে কংগ্ৰেছ হাইকামাণ্ডৰ হাতত জিতেন্দ্ৰ সিঙে দাখিল কৰিছে অসমত দলৰ সাংগঠনিক অৱস্থা সম্পৰ্কীয় এক প্ৰতিবেদন ।

দক্ষিণ কামৰূপৰ অনগ্ৰসৰ অনুসূচীত লোকৰ বসতি প্ৰধান গাঁও কুকুৰমাৰা । সকলো দিশৰ পৰা অৱহেলিত গাঁওখনলৈ অৱশেষত চকু পৰিল অসম চৰকাৰৰ । ঘোষণা কৰিলে আদৰ্শ গাঁও হিচাপে ।

নগাঁৱত জননেতা তৰুণ গগৈৰ চিতাভস্মত শ্ৰদ্ধাঞ্জলি অৰ্পন । জিলা কংগ্ৰেছৰ শান্তি সদ্ভাৱনা যাত্ৰা । নেহৰুবালিত কলংঘাটত বিসৰ্জন চিতাভস্ম ।

বৃটেইনৰ প্ৰধানমন্ত্ৰী বৰিছ জনচনে ১৯ ডিচেম্বৰত প্ৰথম কৰ‘ণাৰ ‘নতুন ধৰণ’ৰ সংক্ৰমণৰ তথ্য পোহৰলৈ অহাৰ কথা ঘোষণা কৰিছিল ৷ যাক প্ৰায় 70 শতাংশ অধিক সংক্ৰমণাত্মক হিচাপে জনা গৈছে।

নাগৰিকত্ব সংশোধনী আইন (কা), ২০১৯ৰ বাতিলৰ দাবী আৰু কাৰাৰুদ্ধ অখিল গগৈৰ মুক্তিৰ দাবীত গোৱালপাৰাত ছাত্ৰ মুক্তি সংগ্ৰাম সমিতিৰ মানৱ শৃংখলা কাৰ্যসূচী ।

নিশা হঠাতে নাওবৈচাত উপস্থিত হৈ এখন দলীয় বৈঠকত মিলিত হয় অগপৰ সভাপতি অতুল বৰা আৰু কাৰ্যকৰী সভাপতি কেশৱ মহন্ত ৷