সন্ধিয়া 5 বজাৰ দহটা শীৰ্ষ বাতৰি

সন্ধিয়া 5 বজাৰ দহটা শীৰ্ষ বাতৰি...

শনিবাৰে নিশাৰ পৰা নিৰুদ্দিষ্ট হৈ আছে উৰিষ্যাৰ বিৰজু কুলু । ২০ বছৰ ধৰি পাকিস্তানত কাৰাবন্দীৰ জীৱন কটোৱা ওড়িশাৰ কটংগাৰ বিৰজু কুলু বিগত বৰ্ষৰ নৱেম্বৰ মাহত স্ব-গৃহত উপস্থিত হৈছিল । চোৰাংচোৱা বুলি সন্দেহ কৰি পাকিস্তানত কাৰাদণ্ড বিহিছিল ৫০ বছৰীয়া বিৰজুক ।

নাগালেণ্ডৰ সুন্দৰ শান্ত সেউজীয়া পৰিৱেশৰ মাজত থকা জুক’ ভেলীৰ বিধ্বংসী বনজুইয়ে 5 দিনত ভৰি দিছে ৷ ভাৰতীয় বায়ুসেনাই ক্ৰমাগতভাৱে অভিযান অব্য়াহত ৰাখিছে যদিও বনজুইয়ে এফালৰ পৰা পুৰি নিঃশেষ হৈছে শতাধিক পৰিমানৰ নাগালেণ্ডৰ ৰাজ্যিক চৰাই ট্ৰাগ’পানৰ ৷

শ্ৰীমন্ত শংকৰদেৱ কলাক্ষেত্ৰৰ শ্ৰীমন্ত শংকৰদেৱ আন্তর্জাতিক প্ৰেক্ষাগৃহত অনুষ্ঠিত এক অনুষ্ঠানত বিশিষ্ট সাহিত্যিক, পণ্ডিত, গৱেষক, অধ্যাপক ভৱপ্ৰসাদ চলিহাক 2020 বৰ্ষৰ ৰাষ্ট্ৰীয় পৰ্যায়ৰ শ্ৰীমন্ত শংকৰদেৱ বঁটা প্ৰদান কৰা হয় ৷ তেওঁৰ অনুপস্থিতিত তেওঁৰ পত্নী নন্দিতা চলিহাই গ্ৰহণ কৰে বঁটা ৷

লখিমপুৰ জিলাৰ নাওবৈচা বিধানসভা সমষ্টিৰ অন্তৰ্গত ফুলবাৰীৰ দহখন বিচনাযুক্ত গ্ৰাম্য চিকিৎসালয়ত নাই কোনো চিকিৎসক, নাৰ্চ ৷ শীঘ্ৰেই হাস্পতালখনত চিকিৎসক, নাৰ্চক নিযুক্তি দিয়াৰ বাবে দাবী জনাইছে ফুলবাৰীবাসীয়ে ।

2022 চনত প্ৰকাশ পাব এঘাৰটা ভাষাত উত্তৰ-পূৰ্বাঞ্চলৰ প্ৰথমখন বহুভাষিক অভিধান ৷ বড়ো, তিৱা, কাৰ্বি , দেউৰী, ডিমাচা, ৰাভা, গাৰো আৰু মিচিং মুঠ 8 টা ভাষাৰ লগতে অসমীয়া, হিন্দী আৰু ইংৰাজী ভাষাতো প্ৰকাশ পাব এই বহুভাষিক অভিধানখন ৷

মহামাৰী ক'ৰণা ভাইৰাচত সমগ্ৰ বিশ্বতে 8,55,20,216 জন লোক সংক্ৰমিত হোৱাৰ লগতে 18,50,941 জন লোক নিহত হৈছে ৷ বৰ্তমানলৈকে 6,04,86,965 জন লোকে মহামাৰীৰ পৰা আৰোগ্য লাভ কৰিছে ৷

আয়কৰ বিভাগ কৰ্তৃপক্ষই সোমবাৰে এক অভিযোগৰ ভিত্তিত বেনামী সম্পত্তি ৰখাৰ অভিযোগত ৰ'বাৰ্ট ভাদ্ৰাৰ বাসগৃহত তালাচী চলায় ৷ ভাদ্ৰা কংগ্ৰেছৰ সভানেত্ৰী ছোনিয়া গান্ধীৰ জোৱায়েক ৷ তেওঁ ছোনিয়া গান্ধীৰ কন্যা তথা কংগ্ৰেছৰ সাধাৰণ সম্পাদক প্ৰিয়ংকা গান্ধীৰ সৈতে বিবাহপাশত আৱদ্ধ হৈছে ৷

বিগত 11 দিনত দেশত 1 কোটি কৰ‘ণাৰ পৰীক্ষা কৰা হৈছে ৷ ইয়াৰে 5.89 শতাংশ লোকৰ শৰীৰত হে কৰ‘ণাৰ অৱস্থিতি ধৰা পৰে ৷ ভাৰতৰ মুঠ 2299 খন গৱেষণাগাৰত কৰ‘ণাৰ নমুনা পৰীক্ষণ কৰি থকা হৈছে ৷

ৰাজহুৱা সম্পত্তি বিক্ৰী আৰু ব্যক্তিগতকৰণ কোনো কাৰণতে মানি নলয় অসম জাতীয়তাবাদী যুৱ ছাত্ৰ পৰিষদে। পৰিষদে নদী বান্ধ আৰু নাগৰিকত্ব আইনৰ বিৰোধিতা কৰি আছে আৰু কৰি থাকিব ৷ অসমত ইনাৰ লাইন পাৰ্মিট প্ৰৱৰ্তন কৰিবই লাগিব ৷ ইনাৰলাইন পাৰ্মিটৰ বাবে দিল্লীত গৈ আন্দোলন কাৰ্যসূচী গ্ৰহণ কৰাৰ হুংকাৰ অসম জাতীয়তাবাদী যুৱ ছাত্ৰ পৰিষদৰ ৷

অসমত আহি উপস্থিত বিজেপিৰ নৱনিযুক্ত ৰাজ্যিক প্ৰভাৰী বৈজয়ন্ত পাণ্ডা আৰু সহ-প্ৰভাৰী পৱন শৰ্মা ৷ দেওবাৰে পাণ্ডা আৰু শৰ্মা অসমত আহি উপস্থিত হয় ৷ সোমবাৰৰ পৰা দুই নেতাই আগন্তুক 2021 ৰ নিৰ্বাচনৰ বাবে আৰম্ভ কৰিছে উজনি অসম অভিযান ৷