Opposition meeting in Bengaluru : বেংগালুৰুৰ বৈঠকত বিজেপি বিৰোধী ২৬ টা দলৰ অংশগ্ৰহণ

বিৰোধী দলৰ বৈঠকৰ প্ৰথম দিনাৰ কাৰ্যসূচী আৰম্ভ হৈছে । য'ত দেশৰ ২৬ টা দলৰ নেতাই অংশগ্ৰহণ কৰিছে । ছোনিয়া গান্ধী আৰু ৰাহুল গান্ধীও বেংগালুৰুত উপস্থিত ।

নেশ্যনেল ডেস্ক,১৭ জুলাই :কৰ্ণাটকৰ বেংগালুৰুত দুদিনীয়া কাৰ্যসূচীৰে অনুষ্ঠিত হৈছে বিৰোধী দলৰ বৈঠক । বিজেপি বিৰোধী দলসমূহৰ এই গুৰুত্বপূৰ্ণ বৈঠকত প্ৰায় ২৬ টা দলে অংশগ্ৰহণ কৰিছে । নিখিল ভাৰত কংগ্ৰেছ কমিটীৰ সভাপতি মল্লিকাৰ্জুন খাৰ্গে, কংগ্ৰেছ সংসদীয় দলৰ অধ্যক্ষ ছোনিয়া গান্ধী আৰু দলটোৰ নেতা ৰাহুল গান্ধী যুটীয়া বিৰোধী বৈঠকৰ বাবে বেংগালুৰুত উপস্থিত হৈছে । জ্যেষ্ঠ নেতাকেইগৰাকীক কৰ্ণাটকৰ মুখ্যমন্ত্ৰী সিদ্ধাৰামাইয়া, উপ-মুখ্যমন্ত্ৰী ডি কে শিৱকুমাৰ আৰু দলৰ অন্যান্য জ্যেষ্ঠ নেতাসকলে আদৰণী জনাইছে ।

দিল্লীৰ মুখ্যমন্ত্ৰী তথা আপৰ ৰাষ্ট্ৰীয় আহ্বায়ক অৰবিন্দ কেজৰিৱালে যুটীয়া বিৰোধী বৈঠকৰ বাবে বেংগালুৰু অভিমুখে ৰাওনা হৈছে । আৰজেডিৰ মুৰব্বী লালু প্ৰসাদ যাদৱ আৰু দলৰ নেতা তথা বিহাৰৰ উপ মুখ্যমন্ত্ৰী তেজস্বী যাদৱেও পাটনা ত্যাগ কৰিছে । আৰজেডিৰ নেতাসকলেও বেংগালুৰুত যুটীয়া বিৰোধী বৈঠকত অংশগ্ৰহণ কৰিব ।

পিডিপিৰ মুৰব্বী মেহবুবা মুফতিও বিৰোধী দলৰ বৈঠকৰ বাবে বেংগালুৰুত উপস্থিত হৈছে । নেশ্যনেল কনফাৰেন্সৰ (এনচি) সভাপতি ফাৰুক আব্দুল্লাও কৰ্ণাটকৰ বেংগালুৰুৰ বিৰোধী বৈঠকৰ বাবে দিল্লীৰ পৰা ৰাওনা হৈছে । বেংগালুৰুৰ এখন পঞ্চতাৰকা হোটেলত বিৰোধী নেতাসকলে বাহৰ পাতিছে বুলি জানিব পৰা গৈছে ।

আনহাতে, এনচিপিৰ সভাপতি শৰদ পাৱাৰে মুম্বাইৰ ৱাইবি চৱন কেন্দ্ৰত উপস্থিত হয় য'ত মহাৰাষ্ট্ৰৰ উপ মুখ্যমন্ত্ৰী অজিত পাৱাৰ আৰু তেওঁৰ গোটৰ এনচিপি বিধায়কসকলে তেওঁক সাক্ষাৎ কৰিবলৈ উপস্থিত থাকে । দুটা দিনৰ ভিতৰত বিদ্ৰোহী এনচিপি নেতাসকলে শৰদ পাৱাৰক সাক্ষাৎ কৰাৰ লগে লগে ৰাজনৈতিক মহলত ব্যাপক প্ৰতিক্ৰিয়াৰ সৃষ্টি হৈছে ।

ইয়াৰ মাজতে চিপিআই (এম)ৰ সাধাৰণ সম্পাদক সীতাৰাম য়েচুৰীয়ে কয় যে এয়া বিৰোধীৰ দ্বিতীয় বৈঠক । দেশৰ গণতান্ত্ৰিক গাঁথনি বচাবলৈ সকলো ৰাজনৈতিক দল একত্ৰিত হৈছে বুলি তেওঁ উল্লেখ কৰে । তেওঁৰ মতে বিৰোধী ঐক্যই ইতিমধ্যে এক বৃহৎ প্ৰভাৱ পেলাইছে আৰু ২০২৪ চনত তেওঁলোকে চৰকাৰ গঠন কৰিব বুলিও তেওঁ দাবী কৰে ।

লগতে পঢ়ক :Opposition slams BJP : 'হতাশগ্ৰস্ত বিজেপিয়ে বিৰোধীক ধ্বংস কৰিব বিচাৰিছে'