নিউজ ডেস্ক, 26 জুলাই: ‘‘কত জোৱানৰ মৃত্যু হ’ল, কাৰ জীৱন-যৌৱন গ’ল; সেই মৃত্যু পৰাজেয় তেনে মৃতক ন’হলো মই কিয় !’’ আজি 24 সংখ্যক কাৰ্গিল বিজয় দিৱস ৷ পাকিস্তানী আক্ৰমণকাৰীৰ পৰা ভাৰত মাতৃক ৰক্ষা কৰাৰ স্বাৰ্থত পৰাক্ৰমেৰে যুঁজি আত্মবলিদান দিয়া বীৰ সৈনিক সকলক এই দিনটোতে স্মৰণ কৰে দেশবাসীয়ে ৷
কাৰ্গিল বিজয় দিৱস উপলক্ষে বুধবাৰে প্ৰধানমন্ত্ৰী নৰেন্দ্ৰ মোদীয়ে ১৯৯৯ চনৰ কাৰ্গিল যুদ্ধত পাকিস্তানৰ বিৰুদ্ধে ভাৰতৰ বিজয়ৰ বাবে সৰ্বোচ্চ বলিদান দিয়া জোৱানসকলক শ্ৰদ্ধাঞ্জলি জ্ঞাপন কৰে । এই দিনটোৱে ভাৰতৰ অতুলনীয় যোদ্ধাসকলৰ বীৰত্বৰ কথা সোঁৱৰাই আহিছে ৷ এইসকল সেনা জোৱান দেশবাসীৰ বাবে সদায় প্ৰেৰণাৰ উৎস হৈ থাকিব বুলি হিন্দী ভাষাত টুইটযোগে প্ৰধানমন্ত্ৰীয়ে কয় ।
১৯৯৯ চনত লাডাখৰ গুৰুত্বপূৰ্ণ অংশ গোপনে দখল কৰা পাকিস্তানী বাহিনীক পিছুৱাই নিবলৈ ভাৰতীয় সেনাই তীব্ৰ প্ৰতিহত আক্ৰমণ চলাইছিল । প্ৰতিবেশী দেশৰ বিৰুদ্ধে ভাৰতৰ জয়ৰ উপলক্ষে কাৰ্গিল বিজয় দিৱস পালন কৰা হয় ।
ইফালে লাডাখৰ দ্ৰাছত ২৪ তম কাৰ্গিল বিজয় দিৱস উদযাপনৰ অনুষ্ঠানত উপস্থিত আছে কেন্দ্ৰীয় প্ৰতিৰক্ষা মন্ত্ৰী ৰাজনাথ সিং ৷ মুখ্য অতিথি হিচাপে উপস্থিত থাকি যুদ্ধ স্মৃতিসৌধত মাল্যাৰ্পণেৰে কাৰ্গিল যুদ্ধবীৰসকলক শ্ৰদ্ধাঞ্জলি জ্ঞাপন কৰে ৰাজনাথ সিঙে ।